Tótenshe jaǵdaılar mınıstri oblys ákimderinen óńirlerdegi órtke qarsy is-sharalarǵa bólinetin qarjynyń kólemin ulǵaıtýdy surady
ASTANA. Qyrkúıektiń 2-si. QazAqparat /Ernur Aqanbaı/ - Búgin selektorlyq formattaǵy Úkimet otyrysynda Tótenshe jaǵdaılar mınıstri Vladımır Bojko oblys ákimderine óńirlerdegi órtke qarsy is-sharalarǵa bólinetin qarjynyń kólemin ulǵaıtý jóninde ótinish jasady.
«Biz jýyrda Bıýdjet kodeksin qarastyrdyq, onda birshama qyzyqty tsıfrlar aıtyldy. Máselen, 2009-2010 jyldardyń ishinde ekonomıka tıimdiliginiń artýy esebinen oblystar qosymsha 200 mlrd. teńgeden astam tabys tapqan. Ol aqsha jergilikti bıliktiń quzyrynda qalyp otyr. Osyǵan baılanysty men oblys ákimderinen máslıhat depýtattarynyń aldyna daladaǵy órtti sóndirý, erikti órt sóndirýshi jasaqtardyń qyzmetin jolǵa qoıýǵa arnalǵan materıaldyq-tehnıkalyq bazany qurý úshin, sondaı-aq áleýmettik-mádenı nysandardaǵy órtke qarsy is- sharalaryn qarjylandyrýdy ulǵaıtý jóninde másele qoıýdy suraımyn», dedi V. Bojko.
Mınıstr áleýmettik jáne bilim berý nysandarynda órtke qarsy qaýipsizdikti qamtamasyz etý máselesi mınıstrliktiń udaıy nazarynda bolatynyn atap kórsetti.
