Tótenshe jaǵdaılar mınıstri Úkimette ant berdi
ASTANA. KAZINFORM — QR Úkimeti týraly Konstıtýtsııalyq zańǵa sáıkes, Úkimettiń jańa múshesi – Tótenshe jaǵdaılar mınıstri Murat Muhanov saltanatty túrde ant berdi.
Ant berý rásimi Úkimettiń búgingi otyrysynda ótti.
— Qazaqstan Respýblıkasynyń halqy men Prezıdentiniń aldynda óz Otanym – Qazaqstan Respýblıkasynyń ekonomıkalyq jáne rýhanı damýyna isine ózimniń bar kúsh-jigerim men bilimimdi jumsaýǵa, memlekettiń Konstıtýtsııasy men zańdaryn qatań saqtaýǵa, ózimniń barlyq is-áreketimdi ádilettilik, azamattyq, ultaralyq jáne konfessııaaralyq tatýlyq prıntsıpterin ustanýǵa, Qazaqstan halqyna adal qyzmet etýge, óz elimniń memlekettiligi men dúnıejúzilik qoǵamdastyqtaǵy bedelin nyǵaıtý úshin saltanatty túrde ant etemin, — dedi M. Muhanov.
Ótken aptada Premer-mınıstr orynbasarlary men mınıstrler tolyqtaı taǵaıyndalyp, Úkimettiń jańa quramy belgili bolǵan edi. Mınıstrlerdiń basym bóligi qyzmetinde qaldy. Degenmen, keı salalardyń mınıstrleri aýysty.
Murat Seıtmoldauly Muhanov 1985 jyly Mańǵystaý oblysynda dúnıege kelgen. QR TJM Kókshetaý tehnıkalyq ınstıtýtyn, RF Azamattyq qorǵanys isteri mınıstrligi Sankt-Peterbýrg memlekettik órtke qarsy qyzmet ýnıversıtetin bitirgen.
