Tótenshe jaǵdaılar men Qorshaǵan ortany qorǵaý vedomstvolaryndaǵy sybaılas jemqorlyqqa qarsy kúres máseleleri qaraldy
ASTANA. Qyrkúıektiń 28-i. QazAqparat /Rýslan Ǵabbasov/ - Búgin Aqordada QR Memlekettik hatshysy-Syrtqy ister mınıstri Qanat Saýdabaevtyń tóraǵalyǵymen QR Prezıdenti janyndaǵy Sybaılas jemqorlyqqa qarsy kúres máseleleri jónindegi komıssııanyń kezekti otyrysy ótti.
Atap aıtqanda, májilis barysynda Tótenshe jaǵdaılar men Qorshaǵan ortany qorǵaý vedomstvolary qyzmetinde jemqorlyqtyń aldyn alý, sondaı-aq Qyzylorda jáne Atyraý oblystary ákimdikteriniń sybaılas jemqorlyqqa qarsy kúrestiń memlekettik jáne óńirlik baǵdarlamalaryn iske asyrý boıynsha is-qımyldary sóz boldy.
Atqarylǵan jumys nátıjeleri jóninde Qorshaǵan ortany qorǵaý mınıstri Nurǵalı Áshimov jáne Tótenshe jaǵdaılar mınıstri Vladımır Bojko baıandap berdi.
Taratylǵan málimetterge qaraǵanda, otyrys qorytyndysy boıynsha komıssııa tıisti memlekettik organdarǵa óz qatarlarynda jemqorlyqty boldyrmaı, kadrlarmen tıisti jáne ashyq jumys isteý, memlekettik qyzmet kórsetý standarttaryn múltiksiz saqtaý men onyń sapasyn kóterý, sonymen qatar sybaılas jemqorlyqqa qarsy kúrestiń 2006-2010 jyldarǵa arnalǵan memlekettik jáne óńirlik baǵdarlamalaryn oryndaý tapsyryldy. Munymen qosa Elbasynyń jemqorlyqpen kúresti kúsheıtý jónindegi tapsyrmasyn iske asyrý boıynsha sharalardy atqarý turǵysynda usynymdar jasaldy.
