Tótenshe jaǵdaılar qyzmetkerleri 27 jylda 401 myńnan astam adamdy qutqarǵan

ASTANA. QazAqparat – 1995 jyldan beri qazaqstandyq qutqarýshylar 1 mln 545 myńnan astam tótenshe jaǵdaı ornyna baryp, olardy joıý jumystaryna qatysqan. Bul týraly Ortalyq kommýnıkatsııalar qyzmetinde ótken brıfıngide Tótenshe jaǵdaılar birinshi vıtse-mınıstri Ibragım Kúlshimbaev aıtty, dep habarlaıdy QazAqparat tilshisi.

«1995 jyldan 2022 jyldyń qyrkúıegine deıin bizdiń qyzmetkerler 1 mln 545 myńnan astam tótenshe jaǵdaı orny men órtterge baryp, olardy joıý jumystaryna qatysty. Olardyń qyzmeti, kásibıligi men jedeldiginiń arqasynda 401 myńnan astam adam qutqaryldy. Tótenshe jaǵdaı bolǵan túrli aımaqtardan 366 myńnan astam adam evakýatsııalandy, 66 myńnan astam zardap shekken adamǵa medıtsınalyq kómek kórsetildi», - dep 27 jyldyq jumys nátıjesimen bólisti Ibragım Kúlshimbaev.

Brıfıng aıasynda tótenshe jaǵdaılar birinshi vıtse-mınıstri qutqarýshylardyń jalaqysyna qatysty da pikir bildirdi. Onyń aıtýynsha, qyzmetkerlerdiń qazirgi jalaqysy jetkiliksiz deńgeıde.