Tótenshe jaǵdaılar qyzmetkeri aqmolalyq balalardy júzýge úıretedi
ASTANA. QazAqparat - Aqmola oblysynyń tótenshe jaǵdaılar qyzmetkeri sýǵa túsý maýsymy qarsańynda balalardy sýda júzýge úıretetin bolady. Bul jaıynda atalǵan óńir ákimdiginiń ishki saıasat basqarmasynan málim etti, dep habarlaıdy QazAqparat.
Aqmola oblystyq tótenshe jaǵdaılar departamentiniń bastyǵy Alekseı Sovetovtyń aıtýynsha, aǵymdaǵy jyldyń basynan beri óńirdiń jabyq sý qoımalarynda mamandar 467 balany sýda júzýge úıretken. Jalpy oblysta demalý men balyq aýlaýǵa arnalǵan 754 sý qoımasy jáne 66 jaǵajaı bar. Demalys aımaqtarynyń basym bóligi Býrabaı men Zerendi shıpajaılyq-kýrorttyq alabta ornalasqan.
Aqmola oblystyq TJD málimetterine sáıkes, ótken jyly óńirde 22 adam, onyń ishinde 1 bala sýǵa batyp ketken.
Qaıǵyly oqıǵalardyń basym bóligi áli kúnge deıin sýǵa túsýdiń qaýipsizdik erejelerin saqtamaýdan, alkogolge masaıǵan kúıde sýǵa túsýden, sonymen qatar ata-analardyń balalaryna salǵyrt qaraýynan oryn alady.
Oblystyq tótenshe jaǵdaılar departamenti turaqty túrde balalardy sýda júzýge úıretip otyrady. Qysqy maýsymda maltyp úıretý kýrstary Kókshetaý qalasyndaǵy basseınderde, al jazǵy maýsymda ashyq sý qoımalarynda júrgiziledi.
