Tótenshe jaǵdaılar qyzmeti almatylyqtardy jolda saq bolýǵa shaqyrdy

ALMATY. QazAqparat- Almaty qalasynyń tótenshe jaǵdaılar departamenti aýa raıynyń buzylýyna baılanysty turǵyndardy saq bolýǵa shaqyrdy, dep habarlaıdy QazAqparat tilshisi.

«Qazgıdromettiń boljamy boıynsha qara aralas jaýyn tústen keıin toqtaıdy. Aýa temperatýrasy búgin kúndiz 0, -2 gradýs, tústen keıin odan ári tómendeıdi» , - delingen habarlamada.

Osyǵan baılanysty Almaty qalalyq TJD júrgizýshilerge jyldamdyqty azaıtyp, kólik arasyndaǵy qashyqty saqtaýǵa jáne jyldam manevr jasamaýǵa shaqyrady.

Almaty qalasynyń TJD jaıaý júrginshilerge saq bolýy kerektin eskertti.

«Esińizde bolsyn, qar men kóktaıǵaq kezinde kólikti basqarý qıyndaıdy, ol jaıaý júrginshini qaǵyp ketýi múmkin; kósheni belgilengen oryndarda ótý kerek; joldan ótken kezde abaı bolyńyz, basqa isterge (uıaly telefonmen sóılesý jáne taǵy basqaǵa alańdamańyz); árqashan aldyńyzǵa, aıaqtyń astyna qarańyz; aıaq kıimdi durys tańdaýǵa nazar aýdarý kerek, aıaq kıim budyrly órnegi bar taıǵanamaıtyn materıaldan jasalǵan tegis tabandy bolýy tıis; qolyńyzdy qaltańyzda ustamańyz, bul sizge taıǵaqta tepe-teńdikti saqtaýǵa múmkindik beredi; trotýar, kólik aıaldamalary, dúken kire berisindegi baspaldaq, úıdiń kireberisi - adamdar jıi qulap, jaraqat alatyn jerler», delingen habarlamada.

Sondaı- aq Almaty TJD kólikterdi aǵashtyń, elektr jelisiniń jáne basqa da ilinip turǵan qurylymdardyń astyna qoımaýǵa keńes beredi.