Tótenshe jaǵdaılar komıteti sý basý qaýpi basym aýyldardy atady
NUR-SULTAN. QazAqparat - QR ІІM Tótenshe jaǵdaılar komıteti sý basý qaýpi joǵary aýyldardy atady, dep xabarlaıdy QazAqparat tilshisi.
Resmı málimetke sáıkes, Shyǵys Qazaqstan oblysynyń Besqaraı aýdanyndaǵy Krıvınka aýylynda 84 úıdi sý basýy múmkin. Sebebi, búginde Ertistiń boıynda úlken muz keptelisi paıda boldy. Al Shúlbi sý qoımasynan sýdy kóptep jiberip jatyr. Tótenshe jaǵdaılar komıtetiniń tóraǵasy Vladımır Bekkerdiń sózine qaraǵanda, ol sý muzdy ary qaraı ıterýi kerek, ıa bolmasa jaǵaǵa shyǵaryp tastaıdy. Biraq usaq muzdar bóget sııaqty sýdy ustap qalady. Sonyń saldarynan sý ózenniń alqabyna jaıylýy múmkin. Al Krıvınka aýyly ózenge jaqyn ornalasqan.
«Osy eldi mekenge jaqyn jerde muz jarý jumystary júrgizildi. Biraq biz dronmen túsirip shyqtyq. Sodan muzdyń kóp jınalǵanyn baıqaýǵa bolady. Bunyń bári sýdy ustap, onyń ózen alqabyna jaıylýyna sebep bolady», - dedi V.Bekker elordada ótken baspasóz máslıxatynda.
Búginde Krıvınka aýylynyń aınalasyna uzyndyǵy - 900 metr, al bıiktigi - 1-1,5 metr bolatyn úıindiler jasap qoıdy. Jalpy, atalǵan eldi mekende 128 úı bar. Halyq sany - 484 adam.
Al Aqmola oblysynda Tselınograd aýdanyna qarasty Qarajar aýylynyń 15 úıin sý basý qaýpi bar. Búginde ol jerde de arnaıy úıindiler jasaldy. Atalǵan aýylda 650 úı bar. Barlyǵy 5 000 adam turady. Budan bólek, Sandyqtaý aýylyn sý basý qaýpi bar.
Aıta keteıik, búgingi brıfıngte komıtet basshysy elordaǵa jaqyn Qosshy aýylyndaǵy aýyz sý máselesin túsindirdi. Komıtet basshysy Qazgıdromettiń aldaǵy boljamyna alańdap otyrǵanyn da jasyrmady. Tótenshe jaǵdaılar komıteti Pavlodar oblysyna tótenshe jaǵdaıǵa daıyn bolýǵa keńes berip otyr.
