Tótenshe jaǵdaılar komıteti sý basý qaýpi bar óńirlerdi atady
NUR-SULTAN. QazAqparat – QR ІІM Tótenshe jaǵdaılar komıteti Aqmola, Qaraǵandy, Shyǵys Qazaqstan, Soltústik Qazaqstan, Qostanaı oblystarynda jáne Nur-Sultan qalasynda sý tasqyny qaýpi saqtalyp otyrǵanyn málim etti, dep habarlaıdy QazAqparat tilshisi.
«Kóktemgi sý tasqyny kezinde 309 eldi mekendi sý basý qaýpi bar. Sý tasqyny saldaryn azaıtý maqsatynda elimiz óńirlerindegi azamattyq qorǵaý organdary tasqynǵa qarsy is-sharalardy júrgizip jatyr. Máselen, Aqmola oblysynda ótken eki táýlik ishinde oblystyq TJD Tselınograd jáne Arshaly aýdandaryna qosymsha kúshter men quraldar, atap aıtqanda jeke quramnan 77 adam jáne 5 birlik tehnıka, 2 motopompa, 2 júzý quralyn jiberdi. Qalyptasqan kolonnalar tasqyn sýynyń ótýi qıyndaǵan kezde apattyq-qutqarý jáne kezek kúttirmeıtin jumystardy júrgizýge baǵyttaldy», - dep habarlaıdy TJK-dan.
Komıtettiń habarlaýynsha, Qostanaı jáne Soltústik Qazaqstan oblystarynyń ózenderinde jazyq ózenderde muz ótkeliniń ótýin qamtamasyz etý jáne muz keptelisteriniń aldyn alý maqsatynda muz jarý jumystary júrgizilgen. Shyǵys Qazaqstanda sý tasqyny jaǵdaıyna aerovızýaldy tekserý júrgizilip, tótenshe jaǵdaılardyń aldyn alý boıynsha qajetti sharalar pysyqtalǵan. Al Pavlodar oblysy aýmaǵynda eldi mekender men joldarǵa qaýip-qaterdi azaıtýǵa baǵyttalǵan aldyn alý is-sharalary ótkizilgen. Eki kún ishinde 7 myń tonna qar shyǵarylyp, ol jumysqa 345 birlik tehnıka jumyldyrylǵan.
«Jalpy, búgingi kúni elimiz óńirlerinde 11 myń shaqyrym aryqtar men arnalardy tazalaý jumystary júrgizildi. 13 mıllıon tekshe metr qar shyǵaryldy, avtomobıl joldarynda 17 myńnan astam sý ótkizý arnasy men temirjoldarda 5 myńnan astam sý ótkizý arnasy tazartyldy. 165 shaqyrym qorǵanys bógetteri jóndelip, sý tasqyny qaýpi bar ózenderdiń ıirilgen 400 shaqyrym arnasyn túzeý júrgizildi, 160 shaqyrym sý burý arnalary ornatyldy», - dep habarlaıdy komıtetten.
Sonymen qatar, Aqmola, Shyǵys Qazaqstan, Soltústik Qazaqstan, Qaraǵandy jáne Qostanaı oblystarynyń ózenderinde 111 muz qopsytý jumystary júrgizilgen.
«Qazgıdromet» RMK derekterine sáıkes Aqmola jáne Qaraǵandy oblystarynyń ózenderi basseınderinde sý qorynyń kólemi 5-15 paıyzǵa, Qostanaı ózenderi basseınderinde 5-55 paıyzǵa azaıdy. Soltústik Qazaqstanda bul rette eleýli ózgeris baıqalmaıdy.
«Tasqyn sýlardy qabyldaý úshin Aqmola, Shyǵys Qazaqstan, Qaraǵandy jáne Soltústik Qazaqstan oblystarynyń sý qoımalarynda tolymdylyq deńgeıi jáne bos kólemder qurý Ekologııa, geologııa jáne tabıǵı resýrstar mınıstrligi Sý resýrstary komıtetiniń turaqty baqylaýynda», - dep habarlaıdy TJK baspasóz qyzmetinen.
