Tótenshe jaǵdaılar komıteti Penjim aýylyn sý basý sebebin atady
NUR-SULTAN. QazAqparat -Almaty oblysynyń Panfılov aýdanyna qarasty Penjim aýylyndaǵy jańbyr sýynyń tasqynyna aryq júıesi qaýqarsyz bolǵan. Bul týraly búgin QR Іshki ister mınıstrliginde ótken brıfıngte Tótenshe jaǵdaılar komıtetiniń tóraǵasy Vladımır Bekker aıtty, dep habarlaıdy QazAqparat tilshisi.
Vladımır Bekkerdiń aıtýynsha, qazir aýlalar men úılerge kirgen sý túgeldeı sorǵytylyp jatyr. Mamandar aýyl ishin batpaq pen úıindilerden de tazartýda.
«Taýdan aqqan tasqyn sekýndyna 20 tekshe metr jyldamdyqpen kelgen. Al aýyldyń aryq júıesi sekýndyna 5 tekshe metr sý ǵana ótkize alatyn. Qalǵan 15 tekshe metr arnadan asyp, aýylǵa jaıylǵan», - dedi ol.
Komıtet tóraǵasy qazir oqıǵa ornynda Almaty oblysy ákiminiń orynbasary bastaǵan komıssııa júrgenin, turǵyndarǵa kelgen shyǵyndy solar esepteıtinin baıandady.
«Ákimdiktiń aqparattyq aktisine súıensek, barlyǵy 181 aýlaǵa laı kirgen, 31 úıdi sý alǵan. Onyń ishinde jertóleler de bar. Tasqynnyń saldaryn joıýǵa 37 tehnıka, 186 adam jumyldyryldy. Keshe bir kún ishinde 163 úıdiń aýlasyn sorǵyttyq. Jumys áli jalǵasyp jatyr», - deıdi komıtet tóraǵasy.
Onyń sózinshe, Penjim aýylynda dál mundaı jaǵdaı qaıtalanbaýy úshin eldi mekenniń taý jaǵynan arnaıy bóget tóseldi. Onyń bıiktigi -1 metr, uzyndyǵy - 400 metrdi quraıdy.
