Tótenshe jaǵdaıdaǵy qaıyrymdylyq rýhymyzdyń myqtylyǵyn kórsetedi - mınıstr
«Iá, qazir kúrdeli de qıyn ýaqyt. Biraq, bul qıyndyqtan qashý, eńseni túsirý degendi bildirmeıdi. Elimizde kún saıyn júzdegen volonterler, metsenattar qaıyrymdylyq jasaýda. Óner adamdary onlaın-kontsert berip jatyr. Odan basqa da meıirim mysaldary kóp. Osynyń barlyǵy rýhymyzdyń myqtylyǵyn dáleldeıdi», - dep atap ótti mınıstr Habar 24 arnasyndaǵy onlaın brıfıngte.
Bul sharaǵa bıznes ókilderi de atsalysýda. Mysaly, «Kar-Tel», «Ksell», «Mobaıl Telekom-Servıs» kompanııalary koronavırýspen kúresip jatqan barlyq dárigerlerdi tegin uıaly baılanyspen qamtamasyz etti. Tótenshe jaǵdaı kezinde elimizde 20 myńnan astam medıtsına qyzmetkerlerine tegin baılanys jáne ınternet paketi berilgen.
«Soltústik Qazaqstan oblysynda meıramhana, kafe jáne ashana ıeleri táýlik boıy jumys isteıtin dárigerler men jedel járdem qyzmetkerlerine tegin ystyq tamaq tasyp júr. Elordada kúnine 200-ge jýyq dárigerge ystyq tamaq beriledi. Almatyda halyqaralyq meıramhanalar jelisiniń biri kúshtik qurylym qyzmetkerlerine túski as jetkizýde. Munyń barlyǵyn kásipkerler óz bıznesi toqtatylǵanyna qaramastan jasap júr», - dedi D. Abaev.
Sonymen birge, mınıstr bıznesin korǵanys quraldaryn shyǵarýǵa burǵan kásipkerlerdi erekshe atap ótti.
«Soltústik Qazaqstan jáne Aqmola oblystarynda antıseptık shyǵarý jolǵa qoıyldy. Shyǵys Qazaqstan tehnıkalyq ýnıversıtetiniń zerthanasynda da anstıseptık shyǵaryla bastady. Jaqyn arada mundaı óndirister ózge oblystarda da ashylady», - dedi Dáýren Abaev.
Buǵan deıin D. Abaev koronavırýs indetimen kúresip jatqan dárigerlerdiń aıyna 1 mln teńgege deıin ústemeaqy alatynyn aıtyp berdi.
