Tótenshe jaǵdaıdaǵy óńir jastarynyń nesıesin óteý keıinge shegerildi - mınıstrlik

ASTANA. KAZINFORM – Eńbek jáne halyqty áleýmettik qorǵaý mınıstrliginiń baspasóz hatshysy Madııar Ýaqpaev sý basqan óńir turǵyndaryna qandaı áleýmettik kómek, qoldaý kórsetilip jatqany týraly aıtty.

«Tótenshe jaǵdaı rejımi jarııalanǵan aýdandar men qalalarda sýbsıdııalanatyn jumysqa ornalasqan 8 myńǵa jýyq adamnyń jalaqysyn eńbek mobıldiligi ortalyqtary jumys berýshilerden málimetterdi talap etpeı tóleıdi. Sonymen qatar shaǵyn nesıelendirý baǵdarlamasy boıynsha qaryz alǵan jastardyń nesıeni óteýdi keıinge qaldyrý qamtamasyz etilip, basqa da memlekettik qoldaý sharalary qarastyrylady», - dedi Madııar Ýaqpaev «Habar» telearnasynyń efırinde «Biz birgemiz!» jalpyulttyq telemarafonyna qatysa otyryp.

Sondaı-aq, Eńbek jáne halyqty áleýmettik qorǵaý mınıstrliginiń baspasóz hatshysy Tsıfrlyq damý, ınnovatsııalar jáne aeroǵarysh ónerkásibi mınıstrligimen birlese otyryp, «Elektrondyq úkimet» mobıldi qosymshasynda sý tasqyny saldarynan keltirilgen zalaldy óteýge ótinishter berý fýnktsııasynyń iske qosylǵanyn aıtty. 

Aıta keteıik, sý tasqynynan zardap shekken 5 myńnan astam otbasyǵa ataýly áleýmettik kómek avtomatty túrde taǵaıyndaldy.