Tótenshe jaǵdaıda qalǵan adamǵa qandaı psıhologııalyq kómek kórsetiledi

NUR-SULTAN. QazAqparat – Tótenshe jaǵdaı saldarynan zardap shekken adamǵa qandaı psıhologııalyq kómek kórsetiledi jáne ol qalaı kórsetiledi? Sol sııaqty jyl saıyn elimizde qansha adamǵa shuǵyl psıhologııalyq kómek usynylady. Bul týraly QazAqparat tilshisine QR Tótenshe jaǵdaılar mınıstrligi Shuǵyl jaǵdaıda psıhologııalyq kómek kórsetý bóliminiń jetekshisi Dınara Jaqybekova aıtyp berdi.

«Bizdiń mindet tótenshe jaǵdaıdan zardap shekken adamǵa shuǵyl psıhologııalyq kómek kórsetý. Sondaı-aq, zardap shegýshiniń otbasy men jaqyndaryna qoldaý kórsetemiz. Kóbinese tótenshe jaǵdaıǵa tap bolǵan adam kúızeliske ushyraıdy jáne júıkesi zaqymdanady. Ondaı jaǵdaıda biz naqty qandaı kómek kórsetimiz? Aldymen tótenshe jaǵdaıdan zardap shekken adammen dıalog jasaımyz, eger sóıleı alatyn jaǵdaıda bolsa. Sóılese otyryp onyń qolyna massaj jasaımyz, bul adamdy qalpyna keltirý ádisiniń bir túri. Sonymen qatar zardap shekken adamdy kórpege oraý da bar. Bir jaǵynan kórpe adam denesin jylytsa, ekinshi jaǵynan shoktaǵy adamǵa kórsetilgen qamqorlyqtyń belgisi», - dedi Dınara Jaqybekova.

Sondaı-aq, mamannyń aıtýynsha tótenshe jaǵdaıǵa tap bolǵan adam úshin jubatý da mańyzdy.

«Tótenshe jaǵdaıdan zardap shekken adamǵa psıhologııalyq kómek 5-10 mınýttyń ishinde kórsetilýi kerek. Adam esin jıyp, óz-ózine kelýine osy ýaqyt jetkilikti. Al eger shok alǵan soń 5-10 mınýttyń aıasynda psıhologııalyq kómek kórsetilmese, onda adamnyń qalpyna kelý protsesi uzaqqa sozylady. Zardap shekkender kóp bolǵan jaǵdaıda medıtsınalyq psıholog mamandaryn kómekke tartamyz. Jalpy elimizde jyl saıyn túrli tótenshe jaǵdaıdan zardap shekken 150-den astam adamǵa shuǵyl psıhologııalyq kómek kórsetiledi», - deıdi ol.

Búginde Qazaqstanda tótenshe jaǵdaıdan zardap shekken adamdarǵa shuǵyl psıhologııalyq kómek kórsetetin 13 psıholog maman bar eken.

«Bizdiń qyzmettiń basqa psıhologtar jumysynan aıyrmashylyǵy kez kelgen sátte daıyn bolyp, kútpegen jaǵdaıda jumys isteı alýymyz qajet. Mysaly, ótken jyly elordada Shubar aýdanyndaǵy dámhanada gaz ballony jarylyp, adamdar zardap shekti. Jáne bir ǵana adam emes, ondaı jaǵdaıda birneshe maman oqıǵa ornyna shuǵyl jetip, kómek kórsetemiz», - dedi psıholog.

Buǵan deıin psıhologııalyq kómek kórsetý bóliminiń basshysy Jambyl oblysyndaǵy jarylystan keıin 56 adamǵa shuǵyl psıhologııalyq kómek kórsetilgenin aıtqan edi.