Tótenshe jaǵdaı jarııalandy: Qaraǵandyda eki kúnnen beri polıgon janyp jatyr
QARAǴANDY. QazAqparat – Órt sóndirýshiler eki táýlikten astam ýaqyt boıy Qaraǵandy qalasynan birneshe shaqyrym jerde ornalasqan qatty turmystyq qaldyqtar polıgonyndaǵy jalynmen kúresýde, dep habarlaıdy QazAqparat tilshisi.
19-21 sáýirde Qaraǵandy oblysy Buqar Jyraý aýdany Doskeı aýylynyń mańyndaǵy qatty turmystyq qaldyqtar polıgonynda órt shyqty. Órtti sóndirýge Tótenshe jaǵdaılar departamenti bólimsheleriniń, jergilikti atqarýshy organdardyń jáne uıymdardyń kúshteri jumyldyryldy. Janý alańy 1200 sharshy metrdi qurady. Ol kezde órt quryqtaldy. Alaıda, tórt kún ótken soń dál sol polıgon aýmaǵyn taǵy da ot sharpyp, eki táýlikten beri jalynmen kúres júrip jatyr.
«Polıgon qaıta jana bastaǵany týraly aqparat 25 sáýirde kelip tústi. Shaqyrtýǵa TJD men jergilikti atqarýshy organdardyń bólimsheleri jumyldyryldy. Janý aýdany - 1 ga qurady. Otty sóndirýdiń kúrdeliligi janý aýmaǵynyń aýqymdyǵymen jáne janǵysh materıaldardyń kóp bolýymen baılanysty. Sondaı-aq bıiktigi 3 metrden asatyn qoqysta tutanǵan otty sóndirý qatty jeldiń saldarynan qıyndaı tústi», - dep málim etti Qaraǵandy oblysy TJD baspasóz qyzmetinen.
Órt sóndirýshiler áli de otpen kúresip jatyr. Oqıǵa ornynda TJD-dan 23 adam jáne 5 tehnıka jumys isteýde.
Buqar jyraý aýdanyna qarasty Doskeı aýylynda jergilikti aýqymdaǵy tehnogendik sıpattaǵy tótenshe jaǵdaı jarııalandy.
