Tótenshe jaǵdaı: Jambylda kókpar men qudalyq uıymdastyrǵandar jazalandy
TARAZ. QazAqparat – Jambyl oblysynyń Jýaly aýdandyq ІІB polıtsııa qyzmetkerleri tótenshe jaǵdaı kezinde jappaı is-sharalar ótkizýdiń eki faktisin anyqtady, dep habarlaıdy QazAqparat.
Jýaly aýdanyndaǵy Talapty aýylynyń 46 jastaǵy turǵyny jalpy tyıymǵa jáne koronavırýstyq ınfektsııadan qorǵaný sharalaryna qaramastan, úıinde ótken qudylyqqa jáne qyzynyń uzatý toıyna qonaqtardy shaqyrǵan. Bul týraly oblystyq polıtsııa departamentiniń baspasóz qyzmeti habarlady.
«Zań buzǵan áıel adamǵa QR ÁQBtK-niń 476-babynyń 6-bóligine sáıkes 10 aılyq eseptik kórsetkish mólsherinde 26510 (jıyrma alty myń bes júz on) teńge aıyppul salynǵan. Sondaı-aq, ulttyq kókpar oıynynyń bastamashysy bolǵan Nurlykent aýylynyń 37 jastaǵy turǵyny da jaýapkershilikke tartylǵan» delingen vedomstvo habarlamasynda.
Aýyl turǵyndary arasynda at jarysyn ótkizgen quqyq buzýshy jeti táýlikke qamaýǵa alyndy.
Polıtsııa departamenti tótenshe jaǵdaı rejımin buzǵany úshin eskertý nemese on aılyq eseptik kórsetkish mólsherinde aıyppul salý nemese 15 táýlikke deıingi merzimge ákimshilik qamaýǵa alý kózdelgenin eskertedi. Sonymen qatar, tótenshe jaǵdaı jarııalanǵan jerde bılik ókiline baǵynbaǵany úshin QR QK-niń 379-babyna sáıkes qylmystyq jaza qarastyrylǵan.
