Tótenshe jaǵdaı rejıminde Mańǵystaý oblysy boıynsha qandaı shekteýler engiziledi

AQTAÝ. QazAqparat- Mańǵystaý oblysynda tótenshe jaǵdaı engizildi, dep habarlaıdy QazAqparat. Prezıdent Mańǵystaý oblysynda tótenshe jaǵdaı rejımin engizý jóninde arnaıy jarlyq shyǵardy.

Mańǵystaý oblysy turǵyndarynyń qaýipsizdigin qamtamasyz etý maqsatynda Qazaqstan Respýblıkasy Konstıtýtsııasynyń 44-babynyń 16) tarmaqshasyna, Qazaqstan Respýblıkasy «Tótenshe jaǵdaı týraly» Zańynyń 4, 5, 6-baptaryna sáıkes QAÝLY ETEMІN:

1. Azamattardyń mańyzdy jáne tikeleı qaýipsizidigine baılanysty, qoǵamdyq qaýipsizdikti qamtamasyz etý, zańdylyq pen quqyqtyq tártipti qalpyna keltirý, azamattardyń quqyqtary men bostandyqtaryn qorǵaý maqsatynda 2022 jylǵy 5 qańtardaǵy 01 saǵat 30 mınýt pen 2022 jylǵy 19 qańtardaǵy 00 saǵat 00 mınýt merzimi kezeńinde Mańǵystaý oblysynyń shekaralarynda tótenshe jaǵdaı engizilsin.

2. Mańǵystaý oblysynda tótenshe jaǵdaıdyń kúshinde bolýy kezeńinde 23 saǵat 00 mınýttan 7 saǵat 00 mınýtqa deıin komendanttyq saǵat engizilsin.

3. Tótenshe jaǵdaıdyń kezeńinde Mańǵystaý oblysynyń komendatýrasy qurylyp, oǵan Qazaqstan Respýblıkasynyń «Tótenshe jaǵdaı týraly» Zańymen kózdelgen ókilettikter berilsin.

Mańǵystaý oblysynyń komendanty bolyp Mańǵystaý oblysy Polıtsııa departamentiniń bastyǵy Janarbek Tóleýbekuly Baqtybaev taǵaıyndalsyn.

4. Tótenshe jaǵdaıdyń kúshinde bolýy kezeńinde mynadaı sharalar men ýaqytsha shekteýler engizilsin:

1) qoǵamdyq tártiptiń saqtalýy, asa mańyzdy memlekettik jáne strategııalyq obektilerdiń, sondaı-aq halyqtyń tynys-tirshiligin jáne kólik qyzmetiniń jumys isteýin qamtamasyz etetin obektilerdiń kúzetilýi kúsheıtilsin;

2) Mańǵystaý oblysynda júrip-turý, onyń ishinde kólik quraldary qozǵalysynyń erkindigine shekteýler belgilensin;

3) jeke tulǵalardyń jeke basyn kýálandyratyn qujattardy tekserý, olardy jeke tekserý, olardyń janyndaǵy zattaryn, kólik quraldaryn tekserý qamtamasyz etilsin;

4) Mańǵystaý oblysyna kirý, sondaı-aq odan shyǵý shektelsin;

5) beıbit jınalystardy, oıyn-saýyq, sporttyq jáne basqa da buqaralyq is-sharalardy uıymdastyrýǵa jáne ótkizýge tyıym salynsyn;

6) ereýilderge jáne zańdy tulǵalardyń qyzmetin toqtata turýdyń nemese toqtatýdyń ózge de ádisterine tyıym salynsyn;

7) qarý, oq-dári, jarylǵysh zattar, arnaýly quraldar, ýly zattar satýǵa tyıym salynsyn, dári-dármektiń, esirtki zattardyń, psıhotroptyq zattardyń, prekýrsorlardyń, sondaı-aq etıl spırtiniń, alkogol ónimderiniń aınalymyna erekshe rejımi belgilensin;

8) jeke tulǵalardan qarý men oq-dárini, ýly zattardy ýaqytsha alyp qoıý, al zańdy tulǵalardan qarýǵa, oq-dárige jáne ýly zattarǵa qosa áskerı jáne jaýyngerlik oqý tehnıkasyn, jarylǵysh jáne radıoaktıvti zattardy ýaqytsha alyp qoıý qamtamasyz etilsin.

5. Tótenshe jaǵdaıdyń kezinde qoldanylatyn sharalardyń iske asyrylýyna jaýapty bolyp Mańǵystaý oblysynyń komendatýrasy, Qazaqstan Respýblıkasynyń Іshki ister mınıstrligi, Qazaqstan Respýblıkasynyń Ulttyq qaýipsizdik komıteti, Qazaqstan Respýblıkasynyń Qorǵanys mınıstrligi, Qazaqstan Respýblıkasynyń Tótenshe jaǵdaılar mınıstrligi belgilensin.

6. Qazaqstan Respýblıkasynyń Bas prokýrory osy Jarlyqpen belgilengen sharalar men ýaqytsha shekteýlerdi iske asyrý kezinde zańdylyqtyń saqtalýyn qamtamasyz etsin.

7. Qazaqstan Respýblıkasynyń Úkimeti tótenshe jaǵdaı rejımin qamtamasyz etý úshin Qazaqstan Respýblıkasy Úkimeti rezervinen qajetti qarajattardy bólsin.

8. Osy Jarlyq qol qoıylǵan kúnnen bastap qoldanysqa engiziledi.

Qazaqstan Respýblıkasynyń

Prezıdenti Q.Toqaev

Nur-Sultan, Aqorda, 2022 jylǵy