Tótenshe jaǵdaı rejımin buzý faktilerine aıyppul somasy artady
Bul norma Parlament Májilisiniń jalpy otyrysynda maquldanǵan «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasynda eskerilgen.
«Budan basqa, Memleket basshysynyń 2020 jylǵy 27 sáýirde bergen tapsyrmasyn oryndaý úshin Úkimet usynǵan, tótenshe ahýal men tótenshe jaǵdaılar kezinde densaýlyq saqtaý júıesiniń jumys isteýin, sanıtarııalyq-karantındik baqylaýdy jetildirýge jáne eldiń epıdemıologııalyq qaýipsizdigin qamtamasyz etýge baǵyttalǵan túzetýler qaralyp qabyldandy. Onyń ishinde Bıýdjet kodeksine, «Kontsessııalar týraly» Zańǵa densaýlyq saqtaý salasyndaǵy memlekettik-jekeshelik áriptestik jobalaryn iske asyrý protsesin ońaılatý bóliginde»,- dedi depýtat Záýresh Amanjolova.
Zań jobasynyń mazmunyn jaqsartatyn jekelegen normalar naqtylandy.
«Densaýlyq saqtaý salasyndaǵy memlekettik-jekeshelik áriptestik jobalaryn iske asyrý protsesin ońaılatý bóliginde Qazaqstan Respýblıkasynyń Bıýdjet kodeksine, «Kontsessııalar týraly», «Memlekettik múlik týraly» QR zańdaryna, eldegi tótenshe jaǵdaı kezinde rejımdi buzǵany nemese shekteý is-sharalarynyń talaptaryn oryndamaǵyn úshin jaýaptylyqty kúsheıtý bóliginde «Ákimshilik quqyq buzýshylyq týraly» QR Kodeksine túzetýler qabyldandy», - delingen Áleýmettik-mádenı damý komıtetiniń tóraǵasy, depýtat Beıbit Mamraevtyń atalǵan zań jobasy boıynsha qorytyndysynda.
Osy oraıda taratylǵan málimette ákimshilik aıyppul 10-nan 100 aılyq eseptik kórsetkishke deıin nemese qamaqqa alý 15 táýlikke deıin ulǵaıtylǵany kórsetilgen. Al qaıta quqyq buzýshylyq úshin – 200 aılyq eseptik kórsetkish mólsherinde ákimshilik aıyppul nemese 30 táýlikke deıin qamaqqa alý kózdelgen.