Tótenshe jaǵdaı rejımin buzǵan «Bentley» júrgizýshisi 15 táýlikke qamalýy múmkin
TALDYQORǴAN. QazAqparat - Búgin Almaty oblysynyń Qarasaı mamandandyrylǵan aýdanaralyq ákimshilik soty tótenshe jaǵdaı rejımin buzǵany úshin «Bentley» markili avtokóliginiń júrgizýshisi men onyń jolaýshysyn ákimshilik jaýapkershilikke tartý týraly sheshim shyǵardy, dep habarlaıdy QazAqparat tilshisi.
Esterińizge salsaq, áleýmettik jelide júrgizýshi, polıtsııa qyzmetkerleriniń talaptaryna baǵynbaı, qorshaý beketin shapshań jyldamdyqpen ótkeni týraly vıdeo keń taraǵan.
Jelide taralǵan vıdeony avtordyń ózi kólik salonynan túsirgen.
Qarasaı mamandandyrylǵan aýdanaralyq ákimshilik soty baspasóz qyzmetiniń málimetinshe, sot otyrysynda «Bentley» markili avtokóliginiń 35 jastaǵy júrgizýshisi D. men 30 jastaǵy jolaýshy A. 2020 jyldyń 10 sáýirinde saǵat 16:00 shamasynda Almaty-Jandosov tasjoly boıymen Jańaturmys aýylynyń qıylysqan jerindegi sanıtarlyq beketinen shapshań jyldamdyqpen óte shyqqan. Olardyń polıtsııa qyzmetkerleriniń talaptaryn eskermegeni de anyqtalǵan.
Sotta quqyqbuzýshylar óz kinásyn tolyqtaı moıyndap, jasaǵan is-áreketterine ókinetindikterin bildirdi.
2020 jyldyń 15 sáýirinde sot olardy Qazaqstan Respýblıkasynyń Ákimshilik quqyqbuzýshylyqtar týraly Kodeksiniń 476-baby 1-tarmaǵynda kózdelgen ákimshilik quqyqbuzýshylyqty jasaǵandary úshin kináli dep tanyp, 15 táýlik ákimshilik qamaqqa alý jazasyn taǵaıyndady.
Qaýly zańdy kúshine engen joq.
Aıta ketken jón, Almaty oblysynyń bas memlekettik sanıtarlyq dárigeriniń qaýlysy boıynsha, turǵyndar arasynda koronovırýs ınfektsııasyn juqtyrý jaǵdaıyn keń taratpaý maqsatynda, Qazaqstan Respýblıkasy Prezıdentiniń «QR aýmaǵyna tótenshe jaǵdaı engizý týraly» Jarlyǵyna sáıkes oblys aýmaǵynda shekteý sharalary kúsheıtilgen bolatyn.
Osyǵan baılanysty, basqa oblyspen qıylysqan shekaralarda oblys aýmaǵyna kirýge shekteý qoıý úshin qorshaý beketteri qoıylǵan.
Biraq, barlyq shekteýlerge qaramastan, jekelegen azamattar tótenshe jaǵdaı rejımin saqtamaı otyr.
