Tótenshe jaǵdaı rejimin buzǵan 143 adamǵa ákimshilik is qozǵaldy

NUR-SULTAN. QazAqparat - Tótenshe jaǵdaı rejimin buzǵan 143 adamǵa ákimshilik is qozǵaldy. Bul týraly búgin Ortalyq kommýnıkatsııalar qyzmetindegi brıfıngte QR Aqparat jáne qoǵamdyq damý mınıstri Dáýren Abaev aıtty, dep habarlaıdy QazAqparat tilshisi.

«Búgingi kúni quqyq qorǵaý organdary Qylmystyq kodekstiń «Sanıtarlyq jáne gıgıenalyq normatıvterdi buzý» baby boıynsha sotqa deıingi úsh tergeýdi bastady. Tótenshe jaǵdaı rejimin buzǵany úshin «Ákimshilik quqyq buzýshylyq týraly» kodekstiń 476-baby boıynsha 143 tulǵaǵa qatysty ákimshilik is qozǵaldy. Mysaly, dámhanalar men meıramhanalar ruqsat etilmegen ýaqytta jumys isteıdi. Jıyn-toı ótkizedi. Osynyń barlyǵy adamdardyń ómirine qaýip tóndiredi. Sondyqtan da olar jaýapqa tartylady. Tolyqtaı alǵanda Nur-Sultan men Almatydaǵy blok-beketterdegi jaǵdaı turaqty. Halyq engizilgen sharalarǵa túsinistikpen qaraýda», - dedi mınıstr.

Onyń atap ótýinshe, búgin elimizdiń bas sanıtarlyq dárigeri halyqtyń qaýipsizdigin qamtamasyz etýge baǵyttalǵan jańa qaýlyǵa qol qoıdy. Atalǵan qaýlyǵa sáıkes, koronavırýs ınfektsııasy qolaısyz elderden kelgen azamattardyń barlyǵy 14 kúnge karantınge jatqyzylady jáne vırýsty anyqtaýǵa arnalǵan test tapsyrady.

«Sóz 1 A sanatyna kiretin Frantsııa, Iran, Ispanııa, Germanııa jáne Italııa syndy elder jaıynda bolyp otyr. Qalǵan elderden kelgen azamattar koronavırýsty anyqtaýǵa arnalǵan saraptamalar tapsyrý úshin statsıonarlyq karantınge 1 kúnge oqshaýlanady. Tipti, teris nátıje bolǵannyń ózinde olar 13 táýlikke úıde oqshaýlanatyn bolady», - dedi Dáýren Abaev.

Mınıstrdiń aıtýynsha, tranzıt arqyly ushyp kelgen azamattarǵa da jiti nazar aýdarylady. Olar barlyq saraptamalardy tapsyrady. Al Qazaqstan aýmaǵyna tranzıttik reıster qonǵan jaǵdaıda, jolaýshylar ushaq bortynan shyqpaıdy.