Tótenshe jaǵdaı rejımi turǵyndardyń qaýipsizdigin qamtamasyz etý úshin kerek - TJD
NUR-SULTAN. QazAqparat - Nur-Sultan qalasy tótenshe jaǵdaılar departamentiniń bastyǵy Baýyrjan Syzdyqov tótenshe jaǵdaı rejımi ne úshin jarııalanatynyn aıtty, dep habarlaıdy QazAqparat tilshisi.
«23 qańtardan bastap aýa raıy buzyldy. Nur-Sultan qalasynan shyǵatyn barlyq jol jabyldy. Osyǵan baılanysty 24 qańtarda elorda ákimi Altaı Kólginovtyń tóraǵalyǵymen qalalyq tótenshe jaǵdaılardyń aldyn alý jáne joıý boıynsha otyrys ótti. Búginnen bastap tótenshe jaǵdaı rejımi jarııalanyp otyr. Barlyq jerde azamattyq qorǵaý qyzmetkerleri jumys atqardy. 23 qańtardan bastap búginge deıin 645 adam qutqaryldy. Olardyń bári Nur-Sultan qalasynyń mańyndaǵy 50 shaqyrymǵa deıingi jerlerden qutqaryldy. Eń bastysy - qutqarylǵandardyń bári aman-esen», - dedi Baýyrjan Syzdyqov qalalyq ákimdikte ótken brıfıngte.
Ol bıyl qalaǵa qansha qar jaýǵanyn aıtty.
«Bıyl qar mólsheri byltyrǵy osy ýaqytpen salystyrǵanda úsh eseden asyp tústi. Tótenshe jaǵdaı jarııalaýdaǵy mindet - halyqtyń qaýipsizdigin qamtamasyz etý. Qaýipsizdikti qamtamasyz etý úshin azamattyq qorǵaý júıesi iske qosylady. TJ rejımi kezinde mektepter men kolledjderde sabaq toqtatylyp, ekonomıkalyq nysandarda jumys bolmaýy múmkin. Sondaı-aq qalaǵa kiretin-shyǵatyn joldar jabylýy múmkin», - deıdi ol.
