Tótenshe jaǵdaı rejımi: Kásipkerler múlik salyǵynan bosatylýy múmkin
NUR-SULTAN. QazAqparat – Qazaqstanda kásipkerlik sýbektilerin múlik salyǵynan bosatý máselesi qarastyrylyp jatyr. Bul týraly «Atameken» UKP kásipkerlerdi quqyqtyq qorǵaý departamentiniń dırektory Shyńǵys Temir aıtyp berdi, dep habarlaıdy QazAqparat tilshisi.
«Jalǵa berýshi jaldaý aqysyn talap etkende jalǵa alýshy ony tóleı almaıdy. Qazir onyń qyzmet túrine tyıym salynsa, onda bul jaǵdaıdan shyǵýdyń birneshe joly bar. Eger osy merzimdegi jaldaý aqysyn toqtatýǵa kelise almasańyz, tólemdi keıinge qaldyrý ádisin qarastyra alasyz», - dedi Sh. Temir onlaın-brıfıngte.
Sonymen birge, «Atameken» UKP Úkimetpen birlesip, jalǵa berýshiler úshin qarjylyq mindettemelerdiń keıbir túrlerin jeńildetý nusqalaryn qarastyrýda.
«Jalǵa berý de bıznes bolyp sanalady, jalǵa berýshiniń nesıe jáne salyq syndy óz mindettemeleri bar. Osyǵan baılanysty biz bıznesti salyqtan bosatýdy usynyp otyrmyz. ıAǵnı, salyq tóleýshilerdiń belgili bir sanatyn belgili bir salyq túrlerinen bosatýdy usynamyz. Qazirgi ýaqytta kásipkerlik sýbektilerin, kásipkerler men zańdy tulǵalardy múlik salyǵyn tóleýden bosatý máselesi pysyqtalýda. Osylaısha qıyndyqqa tap bolǵan kásipkerlerge kómekteskimiz keledi», - dedi Shyńǵys Temir.
Buǵan deıin palata ókili qazaqstandyq kásipkerlerge fors-major jaǵdaıyn rastaıtyn anyqtamanyń tegin beriletinin málimdegen edi.
Sondaı-aq «Atameken» UKP tótenshe jaǵdaıdyń jarııalanýynan zardap shekken kásipkerler týraly baıandady.
