Tótenshe jaǵdaı rejımi alynǵannan keıin erkinsip kettik - QR Prezıdenti
NUR-SULTAN. QazAqparat - COVID-19 áli de bolsa úlken qater tóndirip tur. Bul týraly «BIZ BIRGEMIZ» onlaın forýmda Qazaqstan Prezıdenti Qasym-Jomart Toqaev aıtty, dep habarlaıdy QazAqparat tilshisi.
«Búginde búkil álemde koronavırýstyń taralýy qorqynyshty aýqymǵa ıe bolyp keledi. Koronavırýs shabýylyna ushyraǵan jalǵyz el biz emespiz. Tóteshe jaǵdaı rejımi alynyp tastalǵannan keıin biz erkinsip kettik, ony moıyndaý qajet. Keıbir azamattar men memlekettik qyzmetshiler «qaýipti kezeń artta qaldy, ótip ketti» dep oılady. Táýekeldi durys baǵalamaý oryn alyp, medıtsınalyq erejeler men uıǵarymdardy saqtaýdy qoıdyq. Jekelegen azamattar mundaı aýrý joq degen ósek-aıańǵa sene bastady. Biraq, COVID-19 áli de bolsa úlken qater tóndirip tur. Sondyqtan Úkimet karantın sharalaryn qaıta kúsheıtti», - dedi Memleket basshysy.
Degenmen, Qazaqstan Prezıdenti kóńil-kúıdi túsirip, kúızeliske boı aldyrýdyń esh qajetti joq ekendigin, tolyq qandy ómir súrýdi jalǵastyra berýimiz kerektigin basa aıtty.
«Búkil álemde adamdar karantın kezinde otbasymen jaqyndasa túskendikteri, balalaryna, olardyń problemalary men alańdaýshylyqtaryna kóp kóńil bóle bastaǵandyqtary týraly oqıǵalarymen bólisýde. Sýretshiler, mýzykanttar, jazýshylar, aqyndar karantın ýaqytynda shyǵarmashylyqpen ónimdi jumys istegendikterin aıtýda», - dedi Qasym-Jomart Toqaev.
Memleket basshysy eń jaman jaǵdaıda da tıimdi dúnıe tabýǵa bolatyndyǵyn atap ótti.
«Árbir daǵdarysta jańa múmkindikter bolady. Biz birgemiz. Biz birge mindetti túrde bul daǵdarysty da eńseremiz. Odan kúshti rýhmen, dúnıetanym máselelerine jańakózqaraspen shyǵamyz. Eń bastysy osynaý kúrdeli synaqty eńseretindigimizge, jeńetindigimizge senim bolýy kerek», - dedi Qasym-Jomart Toqaev.
