Tótenshe jaǵdaı: Nur-Sultan qalasynda bıznes nysandarynyń kólikteri qalaı qozǵalýy kerek
NUR-SULTAN. QazAqparat – Nur-Sultan qalasyndaǵy komendanttyq saǵat kezinde bıznes sýbektilerine tıesili kólik quraldarynyń qyzmetin retteıtin ereje shyqty, dep habarlaıdy QazAqparat tilshisi.
Qujat boıynsha, Tótenshe jaǵdaı kezeńinde bıznes sýbektileri (saýda obektileri men bazarlar, dúkender, dárihanalar jáne basqa da obektiler):
1. Jumys kestesin 8 saǵat 00 mınýttan 22 saǵat 00 mınýtqa deıin qamtamasyz etsin;
2. Bıznes sýbektileriniń basshylary tonaý, taýarlardy urlaý jáne múlikti búldirý jaǵdaılaryn boldyrmaý úshin qosymsha qaýipsizdik sharalaryn qabyldasyn;
3. Azyq-túlik jáne tamaq ónimderin úzdiksiz jetkizýdi uıymdastyrsyn.
Úsh aýysymdy kestemen jumys isteıtin jáne áleýmettik mańyzy bar azyq-túlik taýarlaryn tasymaldaýshy uıymdardan basqa azyq-túlik emes taýarlardy, shıkizatty, materıaldardy jetkizý qyzmetteriniń jumysy komendanttyq saǵat bastalǵanǵa deıin jumys kestesine sáıkes uıymdastyrylsyn;
Sondaı-aq, uıymdardyń kólik quraldarynyń komendanttyq saǵat kezinde kedergisiz qozǵalysyn qamtamasyz etilýi kerek.
Nur-Sultan qalasyndaǵy kásipkerlik salasyndaǵy ýákiletti organ kún saıyn avtokólik quralyna arnaıy ruqsattama berip otyrady.
Osyndaı ruqsatpen qalada kólikpen júrý úshin mynadaı qujattar kerek:
Jeke kýálik nemese pasport (júrgizýshi jáne qyzmetkerler);
avtokólik quralyna arnaıy ruqsattama;
taýar júkqujaty jáne túpnusqadaǵy jetkizý mekenjaılary;
Úsh aýysymdy jumys kestesi bar qyzmetkerlerdi tasymaldaý kezinde tótenshe jaǵdaı kezinde jumys ornyn rastaıtyn qujat (jumys ornynan anyqtama jáne t. b.) túpnusqada;
jetkizý mekenjaıy qujatta kórsetilgen jumys ornyna sáıkes kelýi kerek.
Úsh aýysymdy jumys kestesi bar bıznes sýbektileri qyzmetkerlerdi turaqty bekitilgen kólik quralynda ortalyqtandyrylǵan tasymaldaýmen qamtamasyz etýge tıis.
