Tótenshe jaǵdaı: Kókshetaýdaǵy vırýsolog dáriger men polıtseı jas otbasynyń alǵashqy synaǵy
KÓKShETAÝ. QazAqparat – Kókshetaýda qalasynda turatyn Sáken men Aqsáýle Qabdylovtar koronavırýs ınfektsııasymen kúresip júrgen elimizdegi sanaýly otbasylardyń biri. Otaǵasy Sáken polıtsııa kapıtany bolsa, jubaıy Aqsáýle vırýsolog dáriger, dep habarlaıdy QazAqparat tilshisi.
Juqpaly derttiń taralý qaýpi qazaqstandyqtar úshin ǵana emes bul jas otbasy úshin de jaýapty mindet ári úlken synaq boldy. Otaǵasy Sáken Aqmola oblystyq PD ýchaskelik ınspektor retinde Krasnoıar aýylyndaǵy PB ákimshilik ýchaskesinde qyzmet isteıdi. Koronovırýs ınfektsııasynyń taralýyna baılanysty engizilgen tótenshe jaǵdaı kezinde jumys rejımi kúsheıtilgen. Onyń ýchaskesinde 4 myńǵa jýyq turǵyn bar. Ol kún saıyn ózine tıesili aýmaqta turǵyndardyń karantındik shekteý talaptarynyń oryndalýyn qamtamasyz etý baǵytynda aldyn alý sharasyn júrgizedi.
Alaıda, Tótenshe jaǵdaıdyń engizilýiniń qıyndyqtary bul otbasyn da aınalyp ótpedi. Úsh jáne bes jastaǵy uldaryn baǵyp-qaǵý máselesi týyndady. Osy kezde balalarynyń qasynda bolý mindetti otaǵasy Sákenge júkteldi. Óıtkeni, olar Sákenniń ata-anasymen birge turady. Sákenniń anasy da medıtsına qyzmetkeri, Aqmola oblystyq kópeıindi aýrhanasynyń onkologııa ortalyǵynda aýrýy asqynǵan naýqastarmen jumys isteıdi.
Al, Aqsáýle «Ulttyq saraptama ortalyǵy» RMK-nyń Aqmola oblysy boıynsha fılıalynda joǵary sanatty vırýsolog dáriger, vırýsologııa zertteýdiń ádisterin meńgergen. Tótenshe jaǵdaı kezinde onyń jaýapkershiligi odan saıyn arta tústi. Sanıtarlyq dáriger retinde aldyńǵy shepte, vırýsologııalyq zerthanada koronavırýs ınfektsııasyna polımerazdy tizbek reaktsııasy ádisi boıynsha test jasaıdy.
«Polımerazdy tizbek reaktsııasy ádisi boıynsha zertteý júrgizý úshin boksqa barǵan kezde biz qaýipsizdik nusqaýyn saqtaý boıynsha nusqamadan ótemiz. Keıin zerthanaǵa kirgen kezde alańsyz jumysqa kirisemiz, – deı kele Aqsáýle Qabdylova tótenshe jaǵdaı kezindegi óziniń kúndelikti jumysy týraly aıtyp berdi. – Biz qatań algorıtm boıynsha jumys isteımiz. Saraptama ortalyǵynyń mamandary retinde ashyq, jabyq turǵan barlyq mekemeni tekseremiz. Vırýs juqtyrý oshaǵyna baryp, synama alamyz, ony zerthana boksyna tasymaldap, óńdeımiz jáne dezınfektsııa júrgizemiz».
Otaǵasy Sáken Tótenshe jaǵdaı kezinde ózine tıesili ákimshilik ýchaskeni josparly túrde aralap shyǵyp, halyq arasynda túsindirý jumystaryn júrgizýde. Turǵyndardyń beıbereket dalaǵa shyqpaýyn qadaǵalap, qoǵamdyq tártiptiń saqtalýyn qamatamasyz etedi. Alaıda, soǵan qaramastan karantındik talaptardy buzatyn turǵyndar da bolyp turady. Olarǵa ákimshilik hattama toltyrylyp, aıyppul salynatyny belgili. Osy rette, polıtsııa kapıtany tótenshe jaǵdaı kezinde masań kúıde kólik aıdaǵan júrgizýshini toqtatqanyn aıta ketken jón.
Sákenniń ákesi Ómirtaı Qabdylov ekinshi dúnıejúzilik soǵystan keıingi jyldary medıtsına men mılıtsııa jartylaı áskerı uıym retinde sanalǵanyn aıtýda. Sol kezdegideı búgingi kúni de densaýlyq saqtaý qyzmetine adamdardyń densaýlyǵyn qorǵaýǵa, al quqyq qorǵaý organdaryna qoǵamdyq qaýipsizdikti qamatamasyz etý mindeti júktelip otyr.
