Bektenov ınternettegi kináratty taýyp, mobıldi baılanysty jaqsartýǵa 3 aı ýaqyt berdi
ASTANA. KAZINFORM — Oblys ortalyqtaryndaǵy mobıldi baılanys qyzmetteri nashar jerlerdi anyqtaý qajet. Bul týraly Premer-Mınıstr Oljas Bektenov aıtty.
«Tsıfrlandyrý salasyndaǵy kórsetkishterimiz jalpy jaman emes. Ásirese memlekettik jáne banktik elektrondyq qyzmetter kórsetý salasyn atap ótýge bolady. Biz aldaǵy ýaqytta da Qazaqstannyń jahandyq tsıfrlyq álemniń belsendi qatysýshysy retinde qalyptasýy úshin sharalar qabyldaıtyn bolamyz. Ol úshin Kaspıı teńiziniń túbimen jáne elimizdiń Batysynan Shyǵysyna deıin talshyqty-optıkalyq marshrýtty júrgizý boıynsha iri jobalar iske asyrylýda. Bul iri Big Tech-kompanııalardy tartýǵa ári usynylatyn kontenttiń deńgeıin arttyrýǵa múmkindik beredi. Bul óz kezeginde tutastaı alǵanda, elimizge mýltıplıkatıvti áser etetin bolady», — dedi Oljas Bektenov.
Sondaı-aq Úkimet basshysy 5G baılanysyn iske qosý sátti júzege asqanyn, qazirdiń ózinde ony elimizdiń 20 qalasynda 3 mln-ǵa jýyq adam paıdalanatyndyǵyn aıtty.
«Mundaı jobalar usynylatyn baılanys qyzmetteriniń sapasyn arttyrýǵa múmkindik beredi. Sondyqtan bul jumys beıindi mınıstrliktiń erekshe baqylaýynda bolýǵa tıis. Osy rette kelesini atap ótkim keledi. Birinshi, Tsıfrlyq damý mınıstrligi óńirlerdiń ákimdikterimen birlesip, bastapqy kezeńde úsh aı merzim ishinde oblys ortalyqtary boıynsha „aqtańdaqtardy“ anyqtaý boıynsha taldaý júrgizip, mobıldi baılanys qyzmetteriniń sapasyn arttyrý boıynsha naqty is-qımyl josparyn ázirleý qajet. Sodan keıin osy jumysty barlyq eldi mekenderde júrgizý kerek bolady. Bul jumysta azamattardan túsetin ótinishterdi mindetti túrde eskerý qajet. Osynyń kómegimen óńirlerdegi „aqtańdaqtardy“ anyqtaýǵa bolady», — dedi Premer-Mınıstr.
Oljas Bektenov ekinshiden, baılanys operatorlarynyń lıtsenzııalyq mindettemelerdi oryndaý máselesin júıege keltirý kerektigin basa aıtty.
«Tsıfrlyq damý mınıstrligi baılanys operatorlarymen birlesip, júktelgen mindettemelerge súıene otyryp, eki aı merzimde jańa 4G bazalyq stantsııalaryn ornatý, tirkelgen ınternettiń eski jabdyqtaryn aýystyrý josparyn bekitýi qajet. Úshinshiden, sý tasqyny jaǵdaıy kezeńinde birqatar óńirlerde elektrmen jabdyqtaý jáne bazalyq stantsııalardyń ajyratylý problemalaryna oraı baılanys úzilgen bolatyn. Tsıfrlyq damý mınıstrligi Ulttyq qaýipsizdik komıtetimen birlesip, bir aı merzimde tótenshe jaǵdaı kezeńinde spýtnıktik baılanys júıelerin paıdalaný múmkindigi máselesin qarastyrýy kerek», — dedi Úkimet basshysy.
