Tótenshe jaǵdaı kezindegi volonterlardyń eńbegi zor - Gúlnar Qabıeva

AQTÓBE. QazAqparat – Tótenshe jaǵdaı kezinde Aqtóbede 150 volonter aýyzbirshilikpen jumys istedi. Olar kásipkerler kómegimen satyp alynǵan azyq-túlik pen dári-dármek, qorǵanysh quralyn muqtaj jandarǵa ýaqytyly jetkizip otyrdy, dep habarlaıdy QazAqparat tilshisi.

Aqtóbede eriktiler qatarynda stýdentter ǵana emes, jas jumysshylar da bar. Olar ken oryndarynda, bank salasy men óndiriste jumys istep júrip, bos ýaqytynda qaıyrymdylyq sharalaryna úles qosady.

«Tótenshe jaǵdaı jarııalanǵan soń eriktilerdi iriktep, naqtylap, bir top quryldy. Quramynda 150 adam bar. Bul qaýipsizdik úshin qabyldanǵan sheshim. Oblystyq volonterler shtabyndaǵy jastar muqtaj, jalǵyzbasty qarııalarǵa kópbalaly, múgedek bala tárbıelep otyrǵan otbasyǵa kómektesip jatyr. Azyq-túlikti jetkizemiz. Tizimdi oblystyq jumyspen qamtý jáne jumyspen qamtýdy úılestirý basqarmasy beredi. Al taǵamdy kásipkerler satyp alady. Ony ár úıge aparýdyń da reti bar. Volonter arnaıy kıim kıedi, zalalsyzdandyrý jumystaryn júrgizip, páterge kirmeı, 2 metr araqashyqtyqty saqtaıdy», - dedi oblystyq jastar resýrstyq ortalyǵynyń basshysy Gúlnar Qabıeva.

Volonterlerdiń bári aldyn ala qaýipsiz kómek berý erejesin úırengen. Olar qorǵanysh quralymen qamtylyp, antıseptık taratyldy.

«Turǵyndar únemi kómek berip júrgen eriktilerdiń baılanys telefonyn biledi. Kómek qajet kezde habarlasyp, aıtady. Sol kezde ortaq chatqa adresin salyp, járdem suraımyz. Volonterler birden usynystaryn aıtyp, mekenjaıǵa barady. Memleket basshysy Qasym- Jomart Toqaev ta qoldaý kórsetip, volonterlerdiń eńbegin joǵary baǵalady. Bul jastardyń yntasyn arttyryp, jigerlendirdi», - Gúlnar Qabıeva.

«Júrekten júrekke», «Aqtóbe – qaıyrymdy jandar», «Volonter - 2020» sekildi toptardyń jumysy shıraq. Olar arnaıy shotqa aqsha jınap, keıin azyq-túlik satyp alyp, muqtaj otbasylarǵa jetkizedi. Al «Zello help» toby bolsa naqty mekenjaıy joq, únemi qaıyr surap júretin adamdardy qamqorlyǵyna alyp, ystyq tamaq aparyp berdi.

«Biz kóp jaıtpen betpe-bet kelemiz. Shyn muqtaj jandardyń bar ekeni ras. Máselen, biz jas otbasyǵa bardyq. Olar shaǵyn otbasyǵa arnalǵan jataqhananyń jertólesinde turady. Úıine azyq-túlik aparǵan kezde balasy qolyn shapalaqtap qýandy. Onyń kózindegi rııasyz kúlki men rızashylyqty sózben aıtyp jetkizý múmkin emes. Jastar dál osyndaı kúnderdi kórip ósse, jaman bolmasy haq. Adamdar kómekke muqtaj, biz qamqorlyǵymyzdy aıamaımyz, al olar alǵysyn aıtady. Bir-birimizdi demep, janynan tabylsaq, elge qosqan kishkene úlesimiz bolady», - dedi oblystyq jastar resýrstyq ortalyǵynyń basshysy Gúlnar Qabıeva.