Tótenshe jaǵdaı kezinde toı jasaǵan túrkistandyq 26 myń teńge aıyppul tóleıtin boldy
TÚRKІSTAN. QazAqparat – Tótenshe jaǵdaı kezinde toı jasaǵan túrkistandyq turǵyn nebári 26 510 teńge aıyppul tóleıtin boldy. Túrkistan qalasynyń mamandandyrylǵan ákimshilik soty óz úıiniń aýlasynda toı jasaǵan azamatqa qatysty sheshim shyǵardy, dep habarlaıdy QazAqparat tilshisi.
Oblystyq sottyń málimetinshe, atalǵan azamatqa qatysty ákimshilik is QR ÁQBtK 476-babynyń 3-bóligimen qaralǵan.
«Sotta M. óz kinásin tolyq moıyndap, istegen isine ókinetinin aıtqan. Sottyń qaýlysymen M. Qazaqstan Respýblıkasy Ákimshilik quqyq buzý týraly kodeksiniń 476-baby 3-bóliginde kórsetilgen quqyq buzýshylyqty jasaǵany úshin kináli dep tanylyp, oǵan 26 510 teńge aıyppul salyndy. Sot qaýlysy zańdy kúshine enbegen» delingen sottyń Facebook áleýmettik jelisindegi paraqshada.
Eske sala keteıik, keshe Túrkistan oblysynda tótenshe jaǵdaı kezinde toı jasaǵan turǵynǵa ákimshilik hattama toltyrylǵan bolatyn.
