Tótenshe jaǵdaı kezinde dárigerlerdi renjitken sátter kóptep kezdesti - Pavel Kazantsev
NUR-SULTAN. QazAqparat – Májilis depýtaty Pavel Kazantsev indetke baılanysty tótenshe jaǵdaı kezinde dárigerlerdi kinálap, kemsitken adamdardy synady, dep habarlaıdy QazAqparat tilshisi.
«Bizdiń dárigerlerimiz qaýip oshaǵynda aldyńǵy qatarda qyzmet etýde. Alaıda olarǵa alǵys aıtyp, qoldaý bildirýdiń ornyna, jelidegi adamdardyń keıbiri olarǵa kúıe jaǵýǵa tyrysyp baǵýda», - dep toqtaldy depýtat Parlament Májilisiniń jalpy otyrysynda.
Osy oraıda áleýmettik jelide túrli pikirler tarap jatqanyn jáne olardyń barlyǵy negizsiz sıpatta ekenin atap ótti.
«Dárigerler tózimdilik tanytyp keledi. Epıdemıologııalyq qaýipsizdik erejelerimen kelispegen shetelden kelgen týrıster balaǵattap, qorqytpaqshy da boldy. Blokposta adamdardyń dene qyzýyn teksermek bolǵan kezde, dárigerlerdiń bul áreketin adamdar smartfonǵa túsirip, álek bolyp jatty. Bizdiń medıtsına qyzmetkerlerimizdi kemsitip, renjitken sátter kóptep kezdesti. Degenmen olar óziniń mindetin oryndap keledi», - dedi Kazantsev.
Osy oraıda ol ınfektsııa juqtyrǵan adamdardy teksergennen keıin, dárigerler úıge barmaıtynyn, karantınge jiberiletinin eske saldy.
«Al olardyń úılerinde kishkentaı balalary, qart ata-anasy jáne ózge de mindetteri bar ekenin umytpaý kerek. Infektsııalyq statsıonarlardyń qyzmetkerleri aýrýhananyń ózinde turyp jatyr. Ózge elderde medıtsına qyzmetkerlerine qurmet kórsetip jatqanyn kórdik. Búgin endi bizdiń qaharmandarymyzǵa qoldaý kórsetip, alǵys aıtýdyń kezegi keldi. Osy oraıda adamgershiligimizdi saqtap, laıyqty qadamdar jasaıyq», - dedi depýtat.
Bul turǵyda ol Premer-Mınıstrdiń orynbasary Eraly Toǵjanov atyna joldanǵan depýtattyq saýalda tıisti uıymdastyrýshylyq, aqparattyq sharalar júrgizý kerektigin usyndy.
