Tótenshe jaǵdaı kezinde almatylyqtardyń jınalý núktesin kórsetetin qosymsha ázirlenedi

ALMATY. QazAqparat – Almatyda tótenshe jaǵdaı kezinde «jınalý núkteleri» qaıda ornalasqan? Bul suraqqa búgin shahar ákimi Erbolat Dosaev Medeý aýdanynyń turǵyndarymen kezdesýde jaýap berdi, dep habarlaıdy QazAqparat tilshisi.

Kezdesý barysynda aýdan turǵyny tótenshe jaǵdaı kezinde halyq jınalatyn oryndar boıynsha suraq qoıdy.
«Men «Samal-2» shaǵynaýdanynda bes qabatty úıde turamyn. Biz jaqta oqý-jattyǵý bolǵan kezde qaıda bararymyzdy bilmeı qaldyq. Sebebi, aınalamyz tolǵan qurylys nysandary. Qaýipti jaǵdaıda eshqaıda qashyp qutyla almaısyń. Ǵımarattarda eshqandaı belgi joq. Shaǵynaýdan turǵyndarymen kezdesýler bolǵan joq»,- dedi qala turǵyny.
Almaty ákimi Erbolat Dosaev bul másele boıynsha halyqqa túsindirý jumystaryna qarajat bólingenin aıtty.
«Qalanyń eski kartasynda búgingi jańa ǵımarattar joq. Sondyqtan qaladaǵy jańa qurylystardy eskere otyryp, Tótenshe jaǵdaılar departamentimen birlesip, qalanyń Bas josparyndaǵy barlyq «jınalý núktelerin» qaıta qaradyq. Jalpy, biz túsindirý jumystaryna qarajat bóldik. Aldaǵy ýaqytta tıisti kesteler qala ákimdigi, TJD saıtynda jarııalanady. Sondaı-aq kelesi jyldyń alǵashqy jartysynda tótenshe jaǵdaı kezinde «jınalý núktelerin» kórsetip turatyn mobıldik qosymsha iske qosylady dep oılaımyn. Kórsetkish belgiler úshin de qarajat bólip, ornatý kerek»,- dedi Erbolat Dosaev.
Almaty qalasynyń Tótenshe jaǵdaılar departamenti bastyǵynyń mindetin atqarýshy Erlan Álibekov zardap shekken halyqty qabyldaý pýnkteriniń sany 545-ke artqanyn jetkizdi.
«Kelesi jyly aýqymdy túsindirý jumystaryn júrgizýdi, sonlaı-aq árbir qala turǵyny tótenshe jaǵdaı kezinde qajetti baǵytty kóre alatyn mobıldik qosymsha ázirleýdi josparlap otyrmyz»,- dedi Erlan Álibekov.