Tótenshe jaǵdaı kezinde ákimshilik isterdi sotta qaraý ýaqytsha toqtatylmaq

ASTANA. QazAqparat – El boıynsha nemese jekelegen óńirlerde tótenshe jaǵdaı rejımi engizilse, ákimshilik quqyq buzýshylyq týraly isterdi sotta qaraý ýaqytsha toqtatylýy múmkin. Bul týraly Ádilet mınıstrligi ashyq talqyǵa shyǵarǵan «QR Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zań jobasynda jazylǵan, dep habarlaıdy QazAqparat tilshisi.

«Qazaqstan Respýblıkasynda nemese onyń jekelegen jerlerinde tótenshe jaǵdaı engizilgen jaǵdaıda Ákimshilik quqyq buzýshylyq týraly isti qaraý merzimi tótenshe jaǵdaı alynǵanǵa deıin toqtatyla turýy múmkin», - delingen qujatta.

Ádilet mınıstrliginiń málimetinshe, qoldanystaǵy normada tótenshe jaǵdaı kezinde isterdi qaraý merzimin toqtatý tártibi joq.

«2020 jyly 16 naýryz ben 13 mamyr aralyǵynda tótenshe jaǵdaı engizildi. Bul rette Ákimshilik quqyq buzýshylyq týraly kodeksiniń normalarynda tótenshe jaǵdaı kezeńinde ákimshilik isterdi qaraý merzimderin toqtata turý tártibi kózdelmegen. Osyǵan baılanysty memlekettik organdar óz qyzmetkerleri men protseske qatysýshylardyń (aýdarmashy, advokat, sarapshy) densaýlyǵyna qaýip tóndire otyryp, is júrgizý normalaryn saqtaý maqsatynda ákimshilik ister men shaǵymdardy qarady. Ult densaýlyǵy bárinen mańyzdy. Sondyqtan ákimshilik ister men shaǵymdardy qaraý merzimin toqtata turýǵa múmkindik beretin normany qarastyrý qajet dep sanaımyz», - dep jazylǵan qujatqa qosymsha berilgen túsindirmede.

Qujat 13 naýryzǵa deıin kópshilik talqylaýda bolady.