Tótenshe jaǵdaı: Qazaly jurtshylyǵy jolda qalǵan jolaýshylarǵa kómektesti
Eldegi tótenshe jaǵdaıǵa baılanysty jergilikti temirjol vokzalynda eki kúnge jýyq jolda aıaldap qalǵan jolaýshylarǵa jergilikti turǵyndar kómek berip, ystyq tamaq uıymdastyryp, qajetti buıymdaryn tegin jetkizgen. Osynaý qıyn kúnderdiń kýágeri bolǵan jolaýshylar búginde Qazaly jurtshylyǵyna rızashylyǵyn jaýdyryp jatyr, dep habarlaıdy QazAqparat tilshisi.
Oqıǵa 5 qańtarda bolǵan edi. Sol kúni elimizdiń kóptegen óńirinde jappaı tártipsizdik saldarynan jolaýshylar qatynasynda edáýir qıyndyq týyndaǵany belgili. Tótenshe jaǵdaıdaǵy belgisizdikke oraı, №33 Almaty-Aqtóbe, №77 Almaty-Mańǵystaý aralyǵynda qatynaıtyn jolaýshylar poıyzy Qazaly temirjol vokzalynda toqtap turýǵa májbúr boldy. Óńirlerdegi jappaı tártipsizdikke baılanysty atalǵan poıyzdarǵa ári qaraı júrýge ruqsat etilgen joq. Osy eki poıyzdyń ishinde 700-800-ge jýyq adam boldy.
Árıne, alǵashqyda jolaýshylar shydamdylyq tanytty. Biraq ýaqyt óte kele olardyń da mazasy qasha bastady. Bireýi tamaq, ekinshisi dári-dármek pen qajetti zatyn izdep, sabylýǵa májbúr boldy. Vokzal ishi nópir halyqqa toldy. Jolaýshylardyń qolma-qol aqshasy da, isher tamaǵy da taýsyldy. Vokzal mańyndaǵy bankomattardaǵy aqshalardy tıisti mekemeler qaýipsizdik jaǵdaıyna baılanysty sheship alǵan bolatyn. Bul da jolaýshylardyń qajetin alýyna birshama qıyndyq týǵyzdy. Aqshasyn bankomatta ustaıtyn jolaýshylar abyrjyp qaldy.
Bul jaǵdaıdan aýdan basshylyǵy men jergilikti eriktiler tolyq habardar boldy. Jolaýshylardyń muqtajyn sheshý maqsatynda tıisti is-sharalar dereý qolǵa alyndy. Aýdan ákiminiń tapsyrmasymen temirjol vokzalynda aýdandyq kásipkerlik bóliminiń basshysy Aqtileý Bóriqulaqov, aýdandyq apparatynyń jumyldyrý daıyndyǵy jáne aýmaqtyq qorǵanys bóliminiń basshysy Ǵalym Smatýllaev jáne ózge azamattar, eriktiler belsendi qımyl júrgizdi. Jolaýshylar poıyzynda syrqattanyp kele jatqan naýqastarǵa dári-dármek jetkizdi.
Odan keıingi kezekte jergilikti kásipkerler jáne eriktilerdiń kúshimen vokzal mańyna arnaıy oshaqtar men qazandar jetkizilip, jolaýshylarǵa ystyq tamaq daıyndaldy. Ýaqyt óte kele jolaýshyǵa kómek beremin deýshilerdiń sany molaıyp, qos poıyzdaǵy jolaýshylar tolyq tegin aspen, qajetti zattarmen qamtyldy.
El ishindegi dúrbeleń shaqta Qazaly temirjol vokzalyna eki kúnge jýyq toqtaýǵa májbúr bolǵan jolaýshylarǵa jergilikti jurtshylyq osylaı bir kisideı qol ushyn sozdy. Syn sátte adamgershiliktiń joǵary úlgisin kórsetken aýdan halqyna poıyzdaǵy kópshilik áli de alǵysyn jetkizip jatyr.
