Tótenshe jaǵdaı: Qazaqstanda qylmys 25 paıyzǵa azaıdy
NUR-SULTAN. QazAqparat – Іshki ister mınıstri Erlan Turǵymbaev eldeig tótenshe jaǵdaılarǵa baılanysty engizilgen shekteý sharalarynyń nátıjesi týraly aıtyp berdi, dep habarlaıdy QazAqparat tilshisi.
«Tótenshe jaǵdaı kezeńinde ishki ister organdary qyzmetti erekshe tártippen atqaryp jatyr. Qoǵamdyq tártipti qamtamasyz etýge 25 myńnan astam polıtseı men Ulttyq ulannyń 5 myń áskerı qyzmetshisi jumys atqarady. 729 asa mańyzdy memlekettik jáne 235 strategııalyq obektilerdi kúzetý kúsheıtildi», - dep habarlady ishki ister mınıstri Erlan Turǵymbaev.
Onyń aıtýynsha memlekettik komıssııa men ákimdikterdiń sheshimderine sáıkes aımaqtarda 298 blok-beket qoıylǵan. Olarǵa 7 myńnan astam polıtsııa jáne Qorǵanys mınıstrliginiń áskerı qyzmetshileri tartylǵan. Sonymen qatar, qalalar men qala syrtyndaǵy joldarda 299 sanıtarlyq beket qoıylǵan. Onda 2 myń polıtsııa qyzmetkeri dárigerlermen medıtsınalyq-profılaktıkalyq baqylaýdy júzege asyrady.
«Eldi mekenderde quqyqtyq tártipti saqtaý qamtamasyz etilýde. Polıtsııa men Ulttyq ulan jasaqtarynyń sany men tyǵyzdyǵy artty. Kósheler, saıabaqtar, skverler, turǵyn úı aýlasy, saýda nysandary jáne bankter baqylanýda. Profılaktıkalyq jumystarǵa volonterler belsendi túrde tartylady. Reıdterge arnaıy ýnıformamen jabdyqtalǵan jáne jeke qorǵanys quraldarymen qamtamasyz etilgen 1 myńnan astam erikti qatysady», - deıdi ol.
Qabyldanǵan sharalar nátıjesinde elimiz boıynsha qylmys 25 paıyzǵa (elordada 34 paıyz, Almatyda 35 paıyz) tómendedi. Qaraqshylyq sany 45 paıyz, tonaý 38 paıyz, urlyq 40 paıyz, buzaqylyq 32 paıyz qysqardy. Kóshelerde jasalǵan qylmys sany 24 paıyz ǵa, basqa da qoǵamdyq oryndarda 22 paıyz ǵa azaıǵan.
«Densaýlyq saqtaý organdarymen birlesip karantındik is-sharalardy qamtamasyz etý boıynsha jumystar jalǵasýda. Eldi mekenderde 220 karantındik nysan kúzetiledi. Aýrý juqtyrǵan oryndardy oqshaýlaý boıynsha arnaıy is-sharalar júrgizilýde. 104 nysan, atap aıtqanda úıler, kireberister, jataqhanalar, jeke turǵyn úıler qorshaldy. Aýrý kúdigi bar azamattar izdestirilip, medıtsınalyq mekemelerge jetkizilýde. Densaýlyq saqtaý organdarynyń suraýlary boıynsha 5068 adam tabyldy», - deıdi Erlan Turǵymbaev.
