Tótenshe jaǵdaı: Qarjy sektorynda qandaı sharalar qabyldandy
ALMATY. QazAqparat – Qarjy sektorynda jaǵdaıdy jeńildetý úshin qandaı sharalar qabyldanyp jatyr. Bul týraly QR Qarjy naryǵyn retteý men damytý agenttigi tóraǵasynyń birinshi orynbasary Oleg Smolıakov brıfıng barysynda aıtyp berdi, dep habarlaıdy QazAqparat tilshisi.
Oleg Smolıakovtyń aıtýynsha, qarjy naryǵynyń ornyqtylyǵyn qamtamasyz etý Agenttik qyzmetiniń negizgi basymdyqtarynyń biri.
«Bank sektory aǵymdaǵy daǵdarysty jaǵdaılarǵa barynsha daıyn boldy, muny 2019 jyly júrgizilgen bank sektory aktıvteriniń sapasyn baǵalaý kórsetti. 2008 jyldan beri jınaqtalǵan kóptegen problemalar anyqtalyp, retteldi. Sonymen birge bank sektorynyń barynsha joǵary ótimdilik deńgeıi bar. Bankterdegi bıznes-protsesterdiń sapasyn jaqsartý jónindegi júıeli jumysy jalǵasýda. Qazirgi ýaqytta Agenttik AQR nátıjeleri boıynsha túzetý sharalarynyń josparlaryn banktermen kelisý jónindegi jumysty aıaqtaýda. Sonymen birge kapıtaldandyrýǵa qoldaý kórsetý jónindegi talaptary jáne qarjylyq ornyqtylyqty arttyrýdyń qoldanystaǵy baǵdarlamasy sheńberinde aǵymdaǵy kredıttik táýekelderdi qamtamasyz etý tetikteri ýaqtyly ári oryndy bolǵanyn pandemııamen baılanysty aǵymdaǵy jaǵdaı kórsetip otyr»,– deıdi Oleg Smolıakov
Sonymen qatar, ol suranystyń, kiristerdiń tómendeýine, kásiporyndar qyzmetiniń toqtatylýyna baılanysty ekonomıkanyń naqty sektorynda jańa táýekelder týyndap, olar qarjy sektoryna da áser etetinin aıtty.
«Koronavırýs pandemııasynyń teris saldarlaryn eńserý, bıznesti kredıtteýge qoldaý kórsetý jáne qaryz alýshylardyń borysh júktemesimen baılanysty táýekelderdi azaıtý úshin daǵdarysqa qarsy qosymsha sharalar qabyldandy. Atap aıtsaq, 2020 jylǵy 30 naýryz - 30 qyrkúıek aralyǵyndaǵy kezeńde prýdentsııalyq retteýdiń ýaqytsha kontrtsıkldik sharalary engizildi. ShOB jeńildikpen kredıtteý baǵdarlamasy ázirlenip, iske asyrylýda, ol úshin 600 mlrd teńge bólindi, sonymen qatar TJ kezinde zardap shekken qaryz alýshylar tólemderiniń merzimin keıinge qaldyrý kózdeldi, – deıdi ol.
