Tótenshe jaǵdaı: Farmatsevterdiń jumysy qalaı uıymdastyrylǵan
ALMATY. QazAqparat – Almatyda onlaın-brıfıng barysynda QR Farmatsevtıkalyq qyzmetti qoldaý jáne damytý qaýymdastyǵynyń prezıdenti Marına Dýrmanova dárihana qyzmetkerleriniń jumysy qalaı qamtamasyz etilgenin aıtty, dep habarlaıdy QazAqparat tilshisi.
Onyń aıtýynsha, farmatsevter birinshi baılanys tizbeginde turǵandyqtan, olardyń aýrý juqtyrý qaýpi joǵary.
«Ár jumys berýshi, dárihana jelisiniń ıeleri óz jumyskerlerin qorǵaý úshin arnaıy qorǵanys kostıýmderi, bas kıim, maskalarmen qamtyǵan. Zararsyzdandyrý quraldary, antıseptıkter de berilgen», - dedi Marına Dýrmanova.
Qaýymdastyq prezıdenti farmatsevterdiń ýájine de jaýap berdi. Olardyń kópshiligi jumystan úılerine qoǵamdyq kólik toqtap qalǵan kezde qaıtatynyn aıtyp, shaǵymdanǵan bolatyn.
«Qaýymdastyq músheleri bolyp tabylatyn dárihana ıelerine saýal jiberildi. Jumys berýshiler jumys ýaqyty keshki 19:00-den kesh aıaqtalatyn bolsa óz jumyskerlerin kólikpen úıine jetkizýdi uıymdastyrady. Bul jumys berýshiniń qarajatynyń esebinen bolmaq», - dedi Marına Dýrmanova.
Onyń aıtýynsha, qazir farmatsevter arasynda koronavırýs juqtyrý deregi joq.
