Tótenshe jaǵdaı: «Damý» qory qandaı kómek kórsetedi
Prezıdent Qasym-Jomart Toqaevtyń 6 qańtardaǵy tapsyrmasy boıynsha, QR Qarjy naryǵyn retteý jáne damytý agenttigi men Ulttyq ekonomıka mınıstrligi tártipsizdikterden zardap shekken shaǵyn jáne orta bıznes sýbektilerine memlekettik qoldaý kórsetý boıynsha sharalar ázirledi.
Sonyń aıasynda Tótenshe jaǵdaı kezeńinde zardap shekken jeke jáne zańdy tulǵalardyń qaryz tólemderin keıinge qaldyrý tártibi bekitilip otyr.
Qujat QR Qarjy naryǵyn retteý jáne damytý agenttigi tóraǵasynyń 2022 jyldyń 10 qańtaryndaǵy №8 buıryǵymen bekitilgen.
Osy qujatqa sáıkes, «Damý» kásipkerlikti damytý qory tótenshe jaǵdaı kezinde zardap shekken shaǵyn jáne orta bıznes nysandarynyń memlekettik baǵdarlamalar aıasyndaǵy jobalar boıynsha alǵan nesıelerin sýbsıdııalaý jáne kepildik berý quraldaryn jeńildetilgen tártippen bir jumys kúni ishinde qaıta qurylymdaýdy maquldaýǵa daıyn ekenin habarlaıdy.
«Bıznestiń jol kartasy-2025» memlekettik baǵdarlamasy aıasynda sýbsıdııalaý jáne kepildik berý quraldary boıynsha jobalardy qaıta qurylymdaý kásipkerlerdiń qarjy-sharýashylyq qyzmetin taldaýsyz bir jumys kúni ishinde maquldaýdan ótedi.
Osy ýaqyt ishinde ótinim qujattary jınalyp, qaıta qurylymdaý sharttary maquldanyp, bankterge hat jiberiledi.
«20 mln teńgege deıingi shaǵyn nesıelerdiń qujattary kredıttiń merzimin uzartý qajet bolsa jáne kepildik merzimin uzartý kerek bolsa ǵana qordyń maquldaýyna jiberiledi», - delingen qordyń baspasóz qyzmeti usynǵan túsindirmede.
«Damý» qorynyń mamandary mıkro, shaǵyn jáne orta bızneske arnalǵan 2022 jylǵy sýbsıdııalaý jáne kepildik berý quraldary jýyq arada tolyq kólemde jalǵasatynyn aıtyp otyr.
Resmı derekke súıensek, 2021 jyly qor 57,7 myń jobaǵa 2,175 trln teńge nesıe bergen. Onyń ishinde 13,4 myń mıkrokásipkerlik jobaǵa 75,4 mlrd teńge nesıe jumsalǵan.
Sýbsıdııaǵa kelsek, 32,3 myń jobaǵa 1 trln 598 mlrd teńge sýbsıdııa tólengen.
Onyń ishinde COVID-19 pandemııasy kezinde neǵurlym zardap shekken kásipkerlerdi qoldaý sheńberinde 11 myń jobanyń 421,7 mlrd teńge nesıesi sýbsıdııalanǵan.
17,3 myń joba boıynsha 366 mlrd teńgeniń nesıesine kepildik berildi.
8,4 myń jobaǵa jeńildetilgen qarjylandyrý qarajaty esebinen 211 mlrd teńge nesıe bólindi.
«Qordyń óńirlik fılıaldaryndaǵy menedjerler ekinshi deńgeıdegi bankter men qarjy uıymdarynda nesıe rámidep jatqan kásipkerlerge online.damu.kz jáne egov.kz. elektrondyq portaldary arqyly keshendi qoldaý kórsetedi. Kásipkerler óz ótinimderin egov.kz jáne online.damu.kz portaldary arqyly onlaın rejımde jibere alady. Sondaı-aq www.damu.kz, www.online.damu.kz saıttary arqyly nemese 1408 biryńǵaı Call-ortalyǵy arqyly aqparat beriledi (qońyraý shalý tegin)», - dep jazady qordyń bapsasóz qyzmeti.
