Tótenshe oqıǵalar sany artyp otyrǵan qazirgi kezde áldekimderdiń tıisti mindetine selsoq qaraýyna jol bermeımiz- TJM
TANA. 18 tamyz. QazAqparat /Gúlmıra Alıakparova/ - Búgin Astanada QR TJM basshysy Vladımır Bojkonyń tóraǵalyq etýimen qalalyq jáne aýdandyq tótenshe jaǵdaılar basqarmalary (bólimderi) men oblystyq departamentter basshylarynyń qatysýymen alǵashqy respýblıkalyq semınar-keńes óz jumysyn bastady.
Oǵan eldiń barlyq óńirinen 250-den astam basshy qatysýda.
Keńes barysynda mınıstr, óńirlerdegi órt sóndirý bólimshelerdiń jaı-kúıin synǵa aldy.
«Órtke qarsy komıteti aýdandyq jáne qalalyq órtke qarsy bólimshelerdiń shuǵyl ákeret etý qyzmetine júrgizgen júıeli tekserýlerdiń nátıjesinen, órt sóndirý depolary men ǵımarattardyń, órt sóndirý avtokólikteri parkteriniń súreńsiz jaǵdaılaryn kórip otyrmyz. Órt sóndirý bólimshelerin kúrdeli jóndeýden ótkizýge qarjy jetkiziliksiz bólinip jatqanyn túsinemin. Biraq, jóndeý jumystaryna aqsha bólinbese, órt sóndirýshilerdiń negizgi quraly - kólikterdiń - lastanǵan, tot basqan kúıde bolýy, onyń sorǵy bóligin aılap qaraýsyz qaldyrý jón emes. Árbir basshy tańerteńgilik tehnıkalardyń jaǵdaıyn jáne sarbazdardyń hal-kúıin bilip otyrýy tıis», - dep atap ótti ol.
V.Bojko, 2009 jyly órt sóndirý bólimsheleriniń qanaǵattanarlyqsyz kúıi úshin Qostanaı oblysynda Amangeldi jáne Jangeldi aýdandarynyń órt sóndirý bólimsheleriniń basshylary qyzmetterinen bosatylǵanyn aıtyp, basqa oblystardaǵy órt sóndirý qurylymdarynyń 10-nan astam basshysy tártiptik jaýapkershilikke tartylǵanyn qulaǵdar etti.
«Ońtústik Qazaqstan oblysynda oryndarymen qoshtasqan basshylar da boldy. OQO-nyń departamentinde júrgizilgen órt beketteri men órt sóndirý bólimsheleriniń qyzmetkerlerin attestatsııadan ótkizý tájirıbesin qoldaımyn. Sebebi, bizde áskerı qyzmet týraly nusqaýlyqtyń erejelerin umytyp qalǵan keıbir joldastar bar ekendigi anyqtaldy. Olar bul orynda ne úshin otyrǵandaryn umytyp qalǵan. Jumys jasamaı-aq bılik qura bastaǵan. Mundaı joldastarǵa aıtarym, bul oryntaqtaryńda uzaq otyra almaısyńdar. Sebebi, tótenshe oqıǵalar sany artyp otyrǵan qazirgi kezde áldekimderdiń tıisti mindetine selsoq qaraǵanyna jol bermeımiz», - dep túıindedi sózin mınıstr.
