Total prezıdentiniń ushaǵy apatyna sebep bolǵan qar jınaıtyn mashınanyń júrgizýshisi ishimdik ishken
ASTANA. QazAqparat - Total prezıdenti Krıstofa de Marjerıdiń bıznes-djetimen soǵylǵan qar jınaıtyn mashınanyń júrgizýshisi mas bolǵan. Bul týraly Reseıdiń Tergeý komıtetiniń resmı ókili Vladımır Markınniń málimetterine súıengen RBK habarlady.
«Qazir qar jınaıtyn mashınanyń júrgizýshisiniń ishimdik ishkeni anyqtaldy. Sonymen birge, is tergelgenshe áýejaıdyń birqatar qyzmetkerlerin shettetý týraly sheshim qabyldanýy múmkin», - dep habarlady V.Markın. Esterińizge sala keteıik, Vnýkovo áýejaıynda apat seısenbige qaraǵan túni boldy. 20 qazan kúni shamamen saǵat 23:57 kezinde Máskeý-Parıj baǵytyndaǵy tórt oryndyq Falcon-300 ushaǵy arnaıy tehnıka avtokóligin qaǵyp ketip, órtenip, ushý-qoný jolyna qulady. Apat saldarynan Total frantsýz kompanııasynyń prezıdenti Krıstof de Marjerı men ekıpajdyń úsh múshesi qaza boldy.
