Tosynsyıǵa toly «tennıs merekesi»

Avstralııa chempıonaty - «Úlken dýlyǵa» deńgeıindegi 4 jarystyń biri. Árbir tennısshiniń alǵa qoıǵan maqsaty osyndaı deńgeıdegi týrnırdiń bireýine bolsa da qol jetkizý. Al qazirgi álem tennısshilerinen osy dárejege qol jetkizgender sany sanaýly ǵana. Endigi kezekte osy jylǵy Avstralııa chempıonatyn saralap ótsek.

Qazaq tennısiniń bolashaǵy - Zarına Dııas

Jarys bastalǵan kezde elimizdiń atynan «úlken dýlyǵa» saıysyna alǵashqy ret 8 sportshy qatysatyn boldy. Onyń jeteýi negizgi týrnır kestesinde básekege túse aldy. Sportshylarymyzdyń ishinen, Zarına Dııastyń erligin aıtpasqa bolmas. Іrikteý týrynda 3 qarsylasynan basym túsip, negizgi saıysta eki tennısshiden óte aldy. Úshinshi aınalymda Sımona Haleptan jeńilis tapty. Jaman emes. Sebebi, irikteý týrymen sanasaq, Zarına 5 qarsylasyn uta aldy. Al negizgi kesteden bastaıtyn tennısshilerdiń biri sol - Halep edi. Myqty tennısshiler qataryna kiretini sózsiz, jáne de Halep Zarınaǵa deıin eki kezdesý ǵana ótkizgen. Sóıtip, Zarınanyń sharshap qalǵanyn da baıqadyq. Alaıda, Avstralııa tórinde jaqsy oıynymen kózge túsip, jankúıer qoshemetine ıe bolǵan qazaq qyzynyń bolashaǵy zor. Jaradyń, Zarına!

Ataqty Serena nemese favorıtterdiń jeńilisi

Esterińizde bolsa, Serenanyń jeńilis tapqany týraly da jazǵan edik. Álemniń birinshi raketkasy Serena Ýılıamstyń osaldyq tanytyp qoıaryn eshkim kútpegen edi. «Serbııanyń sulýy» bolǵan Ana Ivanovıch tórtinshi aınalymda Serenanyń jarys jolyn toqtata aldy. Úshinshi raketka Marııa Sharapova da tórtinshi aınalymda jeńilip qaldy. Avstralııa jankúıerleri jarystyń qyzyǵy áli alda ekenin baıqaǵandaı boldy.

Erler arasyndaǵy saıys ta sensatsııalyq nátıjelerge toly boldy. 2009 jyly álemge áıgili Nadaldi, sodan keıin aqtyq básekede Federerdi jeńip, Amerıka ashyq chempıonatyn baǵyndyrǵan argentınalyq talant Hýan Martın Del Potro nebári ekinshi aınalymǵa ǵana jetip, ary qaraı óte almady. Álemniń 5-shi raketkasy ózine saı oıyndy kórsete almasa kerek. Sodan keıin azýly bolǵandar sany 8-ge jetip, shırek fınaldyq juptar kezdesti. Álemdik reıtıngte 2, 3, 4-shi turǵan úsh tennısshi shırek fınalda qarsylastarynan jeńilis tapty. Onyń ishinde eń qyzyǵy Avstralııa chempıonatynyń tórt dúrkin chempıony, sonyń úsheýin sońǵy úsh jyl qatarynan ıemdenip kelgen serbııalyq tennısshi Novak Djokovıchtiń jeńilis tabýy. Iá, ony jeńgen Stanıslas Vavrınka. Dál solaı. Shveıtsarııanyń dańqty tennısshisi Rodjer Federerden keıingi ekinshi tennısshi. Ótken jyly da serbke qarsy oıynda jeńiske jaqyn bolǵan Vavrınka bul joly shyn máninde myqty boldy.

Tennıs tarıhyndaǵy «pe(RF)ect»!

Aǵylshyn tilinen "perfect" sózi minsiz degendi bildirse kerek. Osy oraıda, Shveıtsarııanyń tennısshisi Rodjer Fededer osyndaı ataqqa barsha tennıs jankúıerlerinen ıelenip ketken edi. «Úlken dýlyǵa» saıystarynda osyǵan deıin 17 ret jeńiske jetken. Sporttyq mansabynda 302 apta boıy álemniń birinshi raketkasy quzyrynda bolyp, rekordtyq kórsetkishti jasaǵan.

Búgingi tańda Federerdiń jasy 32-de, sporttyq jaspen qaraǵanda árıne, ardagerlik jasqa taıap qalǵandaı. Desek te, Federer mansabyn aıaqtamas buryn, basqa tennısshilerge qaýqaryn kórsetýdi qoıar emes. Avstralııa týrnırin 4 ret baǵyndyrǵan. Uly tennısshi osy jyly jartylaı fınalǵa deıin ótip, Avstralııada 11 ret qatarynan jartylaı fınaldyq mejeden tómen bolmaı, taǵy bir rekordqa ıe boldy. 32 jasar tennısshi álemniń qazirgi birinshi raketkasy ıspandyq Rafael Nadalǵa ese jiberdi. Nadal men Federer arasyndaǵy báseke qashanda qyzyq bolary sózsiz. Biraq, fınalda olardyń bireýimen kezdesýi tıis Stanıslas Vavrınka óz otandasyn Federerdi kútkenin aıtty.

Stanıslastyń sensatsııasy ma, álde Stanıslas basqalarǵa synaq pa eken?!

Mine, chempıonat ta óz máresine jetti. Aqtyq synda 13 ret «úlken dýlyǵa» saıystarynda jeńiske jetken ıspandyq Nadal men sporttyq mansabynda tuńǵysh ret «úlken dýlyǵada» fınalǵa shyǵyp otyrǵan shveıtsarııalyq Vavrınka. Barlyǵy úshin Nadaldiń basym bolatyndyǵy kútilgen edi. Vavrınka úshin fınalǵa jetýdiń ózi úlken erlik dep sheshti jankúıer qaýym. Biraq oıyn bastalysymen, Shveıtsarııa tennısshisiniń «tek Djokovıchti utyp qana qoımaımyn, álemniń birinshi raketkasyn da ońdyrmaımyn» degen daıyndyǵy baıqalǵandaı. Oıynnyń eki seti ótkennen keıin baıqalǵan nárse, iske asyp bolǵandaı. Nadal tek úshinshi sette amal taýyp, sol setti ózine jazdy. Tórtinshi setti ıspandyq utsa, match besinshi setke ulasatyny anyq. Al eger tórtinshi setti Stanıslas alsa... Onda bul tarıh.

Stanıslas Vavrınka óziniń «úlken dýlyǵa» deńgeıindegi tuńǵysh fınalymen ǵana toqtalmaı, tuńǵysh úlken týrnırin baǵyndyrdy. Álemniń 8-shi raketkasy bolyp turǵan jerinen, upaı sanymen endi úshinshi satyǵa kóterildi. Qaıtpas qaısarlyǵy men minezdiliginiń arqasynda tennıs áleminde óziniń azýly qarsylas ekendigin dáleldedi. «Stan» - chempıon!

P.S. Qandaı sport túri bolmasyn, jeńis sezimi sportshy kózin jasqa toltyrary sózsiz. Kún-tún demeı jattyqqan sportshynyń birde qoıǵan maqsatyna jetýi - erlik dep sanaımyn óz basym. Óıtkeni, «erlik» dep ataǵan sózimniń ishinde sol jeńiske jetkizgen joldyń jatqany belgili.

Avstralııa ashyq chempıonatynyń qorytyndysy boıynsha jeńimpazdar:

Erler arasynda jekeleı synda: Stanıslas Vavrınka (Shveıtsarııa)

Áıelder arasynda jekeleı synda: Lı Na (Qytaı)

Erler arasynda juptar synynda: Kýbot L. (Polsha) /Lındshtedt R . (Shvetsııa)

Áıelder arasynda juptar synynda: Erranı S. /Vınch ı R. (Italııalyq jup)