Tósbelgidegi tarıh: Astanada falerıstik jádigerler kórmesi ashyldy
ASTANA. QazAqparat - Elordadaǵy QR Ulttyq mýzeıinde «Tósbelgilerdegi tarıh» falerıstik kórmesi ashyldy, dep habarlaıdy QazAqparat tilshisi.
Kórmege shyǵysqazaqstandyq falerıst Qaıyrbek Ramazanov jınaǵan tańdamaly tósbelgiler qoıyldy.
«Buryndary Ekinshi Dúnıejúzilik soǵystan oralǵan atalarymyzdyń orden-medaldaryn ata-analarymyz qasterlep, balanyń qoly jetpeıtin jerde saqtaıtyn. Ulttyq mýzeı bul baǵytqa da úlken kóńil bólip keledi. Álemde ár orden-medal tarıhynan kitap jazyp, tanylǵan tulǵalar bar. Qaıyrbek Ramazanovtyń da jınaǵan buıymdary halqymyzdyń tarıhyn túgendeý turǵysynda qundy jádigerler bolyp sanalady. Ásirese jas urpaq úshin tárbıelik mańyzy zor kórme bolady dep esepteımin. Q. Ramazanov ózi jınaǵan 12 myń medaldiń árqaısysyna ǵylymı turǵyda toqtalyp, anyqtamalyq tujyrym jasaǵan. Bar jádigerin halyqpen bólisip, mýzeı qoryna usynýy da aǵamyzdyń otansúıgishtiginen habar beredi»,- dedi kórmeniń ashylý saltanatynda QR Ulttyq mýzeıi dırektorynyń orynbasary Abaı Satybaldın.
Búginde Qaıyrbek Ramazanovtyń toptamasynda 12 myńnan astam tósbelgi, orden men medaldar bar. Onyń 10 myńǵa jýyǵy Ulttyq mýzeı qorynda saqtaýly.
«Ótken ǵasyrdyń 1970 jyldarynan bastap, qolyma túsken barlyq tósbelgilerdi jınap kelemin. Jeke qorymda keńestik zamannan búginge deıingi eńbek dańqy ordenderi, ǵarysh, teńiz floty, pedagogıka, sport, aýyl sharýashylyǵy boıynsha otandyq jáne sheteldik orden-medaldar bar. Dúnıejúziniń monetalary men qaǵaz aqshasy bar. Tipti júz myń teńgege Pobeda tósbelgisin satyp alǵanmyn. Munyń bári - tunyp turǵan tarıh»,- deıdi Qaıyrbek Ramazanov.
Onyń aıtýynsha, KSRO-da falerıstıka 1950 jyldary tanymal boldy. Bul kezde memleketaralyq baılanystarmen týrızmge kóńil bóline bastaǵan jáne túrli estelik buıymdar jappaı shyǵarylǵan.
Spıker óz sózinde Qazaqstan jastaryn falerıstıkamen belsendi aınalysýǵa shaqyrdy.
«Kóp adamdar ata-babalarynan qalǵan estelik belgilerdi qunttamaıdy, joǵaltady, aıaqasty etedi. Kollektsıoner retinde elimizdegi qanshama tósbelginiń saqtalmaǵanyna, jer betinen joǵalǵanyna janym ashıdy. Eleýsiz bolyp kórinetin estelik belgilerdi elý jyldan beri jınadym. Qazaqtyń ul-qyzdary, ásirese jastar, úıińizde jatqan bir tıyn, bir medal bolsa da, mýzeıge tapsyrýǵa tyrysyńyzdar. Munyń bári keler urpaqqa mura bolyp qalady. Árqaısysy - tarıhtan syr shertetin qundy jádiger bolyp sanalady», - dedi ol.
Qaıyrbek Ramazanov Óskemendegi mashına jasaý zaýytynda ınjener bolyp qyzmet etken. Qazir zeınette, Astana qalasynda turady jáne falerıstik kórmeler ótkizedi.
Aıta keteıik, falerıstıka - medal, orden, tósbelgi, mereıtoılyq, qurmet jáne vedomstvolyq syndy ártúrli tóske taǵatyn belgilerdi jınaqtaý. Bul ataý Rım legıonerleriniń marapatyn bildiretin «Falera» sózinen shyqqan. Atalǵan uǵymdy ótken ǵasyrdyń otyzynshy jyldary chehoslovakııalyq ǵalym ári kollektsıoner Oldjıh Pılts alǵash ret qoldanyp, ǵylymı qoldanysqa engizgen.
