Tórtinshi munaı óńdeý zaýytyn salýǵa 10 mlrd dollar jumsalýy múmkin

ASTANA. KAZINFORM — Energetıka vıtse-mınıstri Qaıyrhan Tutqyshbaev otyn tapshylyǵy máselesin sheshýge qatysty túsinik berdi. 

— Elde úsh munaı óńdeý zaýytyn jańǵyrtý jáne óńdeý qýatyn arttyrý aıasynda 2032 jylǵa qaraı tapshylyqty tolyǵymen jabýdy josparlap otyrmyz. Sonymen qatar, tórtinshi munaı óńdeý zaýytyn salý máselesin belsendi túrde talqylap jatyrmyz, — dedi Qaıyrhan Tutqyshbaev Úkimet otyrysynan keıingi baspasóz máslıhatynda.

Onyń aıtýynsha, jańa zaýyt shamamen jylyna 10 mln tonna munaıdy óńdeıdi.

— Onyń ornalasatyn jeri men tehnıkalyq sıpattamalary keıinirek jarııalanady. Bastapqyda ol zaýyt shamamen 10 mln tonna munaı óńdeıdi. Aldyn ala quny 10 mlrd dollarǵa baǵalanyp otyr. Jańǵyrtý jáne qýatty arttyrý, sondaı-aq jańa zaýytty salý arqyly áýe kóligi otyny men dızel otynynyń tapshylyǵyn tolyǵymen jabamyz. Sonymen qatar, basqa elderge eksporttaı alamyz, — dedi vıtse-mınıstr.

Buǵan deıin tórtinshi munaı óńdeý zaýyty Ulytaý oblysynda salynýy múmkin ekeni aıtylǵan.