Tórtinshi munaı óńdeý zaýyty naqty salynady - Tutqyshbaev

ASTANA. KAZINFORM — Tórtinshi munaı óńdeý zaýyty naqty salynady. Bul týraly Energetıka vıtse-mınıstri Qaıyrhan Tutqyshbaev aıtty.

Májilistiń jalpy otyrysynan keıin BAQ ókilderi odan: «Tórtinshi munaı zaýytyn salý 10 jyldan beri aıtylyp keledi. Ár mınıstr kelgen saıyn salamyz degenimen áli salynǵan joq. Bul joly naqty salyna ma?», - dep surady

Saýalǵa jaýap bergen vıtse-mınıstr zaýyttyń naqty salynatynyn aıtty.

- Birinshiden, bul munaı óńdeý zaýyty tek munaı ǵana emes, munaı-hımııa óńdeý zaýyty bolady. Zaýyt munaı men hımııany damytý tujyrymdamamyzǵa endi. Ekinshiden, Memleket basshysynyń, Prezıdent Ákimshiliginiń, Úkimettiń naqty tapsyrmasy bar. Sondyqtan osy joly bul qurylys strategııalyq qujattarymyzǵa engizildi. Qurylys qolǵa alynyp, Qazaqstanda tórtinshi zaýyt bolady, - dedi Qaıyrhan Tutqyshbaev.

Osyǵan deıin tórtinshi munaı óńdeý zaýyty Ulytaý oblysynda salynýy múmkin ekeni týraly jazdyq.