«Tórtkúl dúnıeniń túıtkili tórt «t» arqyly sheshilmek» - respýblıkalyq basylymdarǵa sholý

«Memleket basshysy Nursultan Nazarbaev Almatydaǵy rezıdentsııasynda Qazaqstan mádenıetiniń ardageri Jeksembek Erkimbekovti qabyldap, onymen ulttyq mádenıetti údemeli damytý jáne ósip kele jatqan shyǵarmashyl jastardyń tárbıesindegi ardagerlerdiń róli týraly máselelerdi talqylady. Elimizdiń Prezıdenti sondaı-aq belgili qazaq jazýshysy Sofy Smataevty qabyldady», dep jazady «Egemen Qazaqstan» gazeti QR Prezıdenti baspasóz qyzmetine silteme jasap.

Keshe Týrızm jáne sport mınıstrliginde Úkimet basshysy Kárim Másimovtiń qatysýymen keńeıtilgen alqa májilisi ótti. Onda eki másele, ótken jylǵy jumys qorytyndylary men aldaǵy kezge josparlanǵan is-sharalar qaraldy. «Egemen Qazaqstan» gazetiniń búgingi sanynda jaryq kórgen «Nátıjeli jumys jalǵasa beredi» atty maqalaǵa osy jıyn arqaý bolǵan. Basylymnyń jazýynsha, májiliste buqaralyq sport pen týrızm sa­la­syn damytý, elimizdiń Qysqy Azııa oıyndaryn ótkizý jáne aldaǵy aqpan aıynda Kanadanyń Vankýver qalasynda jalaýyn kóteretin Olımpıada oıyndaryna sportshylardy daıyndaý máse­lesine basa nazar aýdarylǵan.

Atalǵan jaıtqa keńinen toqtalǵan «Aıqyn» gazeti «Úkimet basshysy mınıstrge ýáde berdi» degen taqyryppen maqala basqan. Alqa májilisinde baıandama jasaǵan Sport jáne týrızm mınıstri Temirhan Dosmuhambetov «Álem chempıonattarynda medal jeńip alǵan sportshylardyń syıaqysyn 7-den 15 myń dollarǵa, Azııada men jasóspirimderdiń olımpıadalyq oıyndary úshin 3,5-ten 10 dollarǵa deıin ósirý qajet», depti. Basylymnyń jazýynsha, óz kezeginde Úkimet basshysy Kárim Másimov Kanadanyń Vankýver qalasynda ótetin álemdik baıraqty básekede Qazaqstan quramasy tabysty óner kórsetse, qarjylyq ótinishterin oryndaýǵa ýáde bergen.

Al osy taqyrypty odan ári qaýzaǵan «Alash aınasy» basylymynyń jazýynsha, 2009 jyly sportshylarymyz álem chempıonattarynda 93 medal oljalaǵan. Elimiz halyqaralyq reıtıng qorytyndysyna sáıkes, olıpıadalyq sport túrinen jeńip alǵan altyn medaldar sany boıynsha álemde 16-shy orynǵa taban tiregen.

«Komsomolskaıa pravda-Kazahstan» gazetiniń jazýynsha, Sport jáne týrızm mınıstrligi Úkimetten álem chempıonattarynda altyn medal alǵan sportshyǵa tólenetin birjolǵy syıaqyny arttyrý úshin 33,5 mıllıon teńge qarjy suraǵan.

«Qazaqmys» top jardy». «Egemen Qazaqstan» gazetiniń jazýynsha, atalǵan kompanııa London qor bırjasyndaǵy alyptar arasynda birinshi oryn alyp, bir jyldyń ishinde aktsııalary 470 paıyzdan astamǵa qymbattaǵan. Basylym birqatar bedeldi sheteldik BAQ-tarda «Qazaqmys» kompanııa­sy­nyń 2009 jylǵy tabysty ju­mysyna toqtalǵandyǵyn alǵa tartyp, olardan úzindi jarııalaǵan.

Qańtardyń 19-ynda Aqordada Qazaqstan Respýblıkasynyń Memlekettik hatshysy - Syrtqy ister mı­nıstri Qanat Saýdabaevtyń tór­aǵalyǵymen (shetelde) kadrlar daıarlaý jónindegi respýblıkalyq komıssııanyń bıylǵy jylǵy alǵashqy otyrysy ótti. «Egemen Qazaqstan» gazetiniń jazýynsha, elimizdiń órkendeýine, bilim-biligine úles qosýǵa umtylǵan jastardyń qujattaryn qaraı kelip, Shetelde kadr daıyndaý jónindegi respýblıkalyq komıssııa otyry­sy­nyń qorytyndysynda 590 úmit­ker­ge «Bolashaq» halyqaralyq stıpendııasyn taǵaıyndaý týraly sheshim qabyldanǵan. «Úmitkerlerge Prezıdenttik stıpendııa taǵaıyndaldy» degen taqyryppen jaryq kórgen maqalany basylymnyń beısenbilik nómirinen egjeı-tegjeıli oqı alasyzdar.

«El bolashaǵy «Bolashaqpen» baılanysty». Osy taqyryppen «Aıqyn» gazetinde jarııalanǵan kelesi maqala da Shetelde kadr daıyndaý jónindegi respýblıkalyq komıssııa otyry­sy­na arnalǵan. Basylymnyń jazýynsha, úmitkerlerdiń basym kópshiligi Ulybrıtanııa, AQSh jáne Reseı joǵary oqý oryndaryna ótinish bildirgen.

«Aıqyn» gazetiniń dástúrli «Aq sóıle!» aıdarynyń búgingi qonaǵy - tehnıka ǵylymynyń doktory Ábdi Qııalbaev. Suhbat «Elimizde kólik joldaryn paıdalaný ózektiligin joıǵan emes» degen taqyryppen jaryq kórgen. Ekeýara áńgimeniń tolyq nusqasyn basylymnyń beısenbilik nómirinen oqı alasyzdar.

***

«Elimiz bıyl Eýropadaǵy qaýipsizdik jáne yntymaqtastyq uıymyna tóraǵalyq estafetasyn alyp, bir apta buryn resmı túrde basshylyq qyzmetke kiristi. Álemdegi eń irgeli aımaqtyq uıymdy basqarý baqyty Qazaqstanǵa kezdeısoq kelgen joq. Bul elimizdiń Táýelsizdik alǵan sátten bastap ustap kelgen turaqty saıasaty men jibekteı jumsaq dıplomatııalyq qarym-qatynasynyń arqasynda buıyrdy», dep jazady «Alash aınasy» gazeti. Maqala «Tórtkúl dúnıeniń túıtkili tórt «t» arqyly sheshilmek» degen taqyryppen jarııalanǵan.

Osy basylymda Qazaqstan halqy assambleıasynyń múshesi, tilshi-ǵalym Asyly Osmanmen aradaǵy suhbat «Til bilgenniń tamyrynda ulttyq, halyqtyq, eldik, memleketshildik qan oınaıdy. Meniń zarym da, daýym da - osy!» degen taqyryppen basylǵan. Ekeýara áńgime barysynda tilshi-ǵalym «Ulttyq rýhtaǵy tárbıe bolmasa, keleshekte bárinen aırylamyz. Men jahandanýǵa qazaq bolyp barǵandy jaqsy kóremin. Ol úshin ata-babamyzdan kele jatqan tárbıeni jandandyrýǵa tıispiz. Tárbıesiz bilim - sýsyz dıirmen. Anaǵan jarmasyp, mynaǵan jarmasyp, ár jerden úzip-julyp bergen bilim «bilim» bolmaıdy. Tárbıeni de, bilimdi de sanaly túrde berýimiz kerek», dep óz pikirin bildirgen.

«Kazahstanskaıa pravda» gazeti «Vashıngton taıms» basylymynda jaryq kórgen QR Prezıdenti Nursultan Nazarbaevtyń «EQYU úshin Sammıt qajet» maqalasynyń aýdarmasyn jarııalady.