Tórtinshi shaqyrylymdaǵy Parlament Senaty sessııany japty
ASTANA. 19 qańtar. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysymen tórtinshi saılanǵan Parlamenttiń besinshi sessııasy jabyldy.
Bul týraly Senat tóraǵasy Qaırat Mámı palatanyń jalpy otyrysynda kúntártibindegi máselelerdi qarap bolǵan soń málimdedi.
«Qazaqstan Respýblıkasy Parlamenti jáne onyń depýtattarynyń mártebesi týraly» Konstıtýtsııalyq zańǵa sáıkes, kezekti saılanǵan Parlamenttiń ókilettiligi kelesi saılanǵan Parlamenttiń birinshi sessııasynyń jumysynyń bastalýymen aıaqtalady.
«Zańǵa sáıkes, jalpy Parlamenttiń ókilettik merzimi kezekti saılanymdaǵy Májilis depýtattarynyń ókilettik merzimimen aıqyndalady. Osyǵan oraı, erteń Qazaqstan Respýblıkasy Parlamenti besinshi shaqyrylymynyń birinshi sessııasy ashylyp, jańa sessııa óz jumysyn bastaıdy. Sol sebepti búgin Senattyń kezekti otyrysyn ǵana emes, tórtinshi shaqyrylymdaǵy Parlamenttiń besinshi sessııasynyń da sońǵy otyrysyn ótkizdik, óıtkeni biz búkil Parlamenttiń jumysyn atqaryp kelemiz», - dep jıyndy qorytyndylaǵan Senat spıkeri Qaırat Mámı, atalǵan jaǵdaıdyń tarıhı oqıǵa ekendigin atap ótti.
Bul rette, Senat tóraǵasy tórtinshi shaqyrylǵan Parlamenttiń qyraýar qyzmet atqarǵanyn, eń aldymen daǵdarysty ońtaıly eńserýge zań shyǵarýshy organnyń sińirgen eńbegi erekshe bolǵanyn atap ótti.
