Tórtinshi sessııa barysynda ártúrli deńgeıdegi laýazymdy tulǵalarǵa 900-ge jýyq depýtattyq saýal joldandy - Májilis Tóraǵasy
ASTANA. 30 maýsym. QazAqparat /Qanat Mámetqazyuly/ - Ótken sessııa barysynda ártúrli deńgeıdegi laýazymdy tulǵalarǵa 900-ge jýyq depýtattyq saýal joldandy.
Búgin QR Parlamenti palatalarynyń birlesken otyrysynda, Parlamenttiń tórtinshi sessııasynyń jabylýy barysynda sóz sóılegen Májilis Tóraǵasy Oral Muhamedjanov osylaı málim etti.
«Depýtattardyń okrýgterdegi saılaýshylarmen kezdesýleri, komıtetterdiń óńirlerdegi kóshpeli otyrystary, Úkimet saǵattary jáne saılaýshylarymyz ben memleket arasyndaǵy baılanysty qamtamasyz etetin qoǵamdyq dıalogtyń basqa da joldary Parlament depýtattarynyń zań shyǵarý qyzmetin jetildirýge aıtarlyqtaı yqpal etti. Ásirese, óńirlerge shyǵý kezindegi saılaýshylarmen qarym-qatynas barysynda halyq qalaýlylary ózderiniń zań shyǵarýlary týraly esep berip, elektorattyń ártúrli máseleler jónindegi pikirin tyńdaıdy. Nátıjesinde jurtshylyqtyń neǵurlym mańyzdy tilekter men usynystary zerdelenip, Úkimet nazaryna usynylady», - dedi Májilis Tóraǵasy. Onyń aıtýynsha, tórtinshi sessııa barysynda 12 úkimet saǵaty ótip, onyń sheńberinde el tynys-tirshiliginiń ózekti máseleleri talqylanǵan.
«Sonymen qatar, halyq qalaýlylary qyzmetiniń depýtattyq saýaldar sekildi mańyzdy túri de belsendi qoldanyldy. Ótken kezeń ishinde ártúrli laýazymdy tulǵalarǵa 900-ge jýyq depýtattyq saýal joldandy. Olar memleketimizdegi kóptegen kókeıkesti problemalardy qamtyp, ártúrli bılik organdarynyń naqty is-áreketterdi júzege asyrylýyna yqpal etti», - dedi O. Muhamedjanov.
