Tórtinshi on jyldyqta bizdi jańa mindetter kútip tur - Memleket basshysy

NUR-SULTAN. QazAqparat - Ótken árbir on jyldyq atqarǵan mıssııasy turǵysynan ǵasyrdyń júgin arqalap tur. Bul týraly Táýelsizdik kúni qarsańynda ótken Memlekettik nagradalardy tapsyrý rásiminde QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Ótken árbir on jyldyq atqarǵan mıssııasy turǵysynan ǵasyrdyń júgin arqalap tur. Alǵashqy on jyldyq egemen Qazaqstannyń óz derbestigin qalyptastyrý kezeńi boldy. Ekinshi on jyldyqta elimiz tuǵyryn nyqtap, keregesin keńeıtip, irgesin bekitti. Úshinshi on jyldyqta memleketimiz shyn máninde, kemeline kelip, álemdik saıasattyń tórine ozdy. Aldaǵy tórtinshi on jyldyqta bizdi jańa mindetter kútip tur. Elimizdi ilgeri damytyp, árbir azamattyń laıyqty turmysyn qamtamasyz etýimiz kerek», - dedi Qasym-Jomart Toqaev.

QR Prezıdentiniń paıymynsha, ony júzege asyrýdyń basty joly – tıimdi basqarý júıesi.

«Men Joldaýymda memlekettik basqarýdyń jańa úlgisine basa mán bergenimdi bilesizder. Osyǵan oraı, kóptegen naqty sharalar atqarylýda. Jalpy, jańǵyrýdyń jan-jaqty bolǵany jón. Búkil halqymyz zaman aǵymyna ilese bilýge tıis. Ózgeristerge beıimdele alatyn jurt qana ýaqyt tynysyn dóp basady. Biz bilimdi ári bilikti, uqypty jáne jaýapty, isker de eńbekqor jurt bolýymyz qajet. Bul – Uly Abaı aıtqandaı, «tolyq adamnyń» aıqyn kórinisi. Oǵan qosa, árkimniń jeke qasıeti men maqsaty eldik múddemen tyǵyz astasyp, patrıotızmge ulasýy kerek. Sonda ǵana memleketshildik ıdeıasy basty qundylyqqa aınalady», - dedi Memleket basshysy.