Tórtinshi munaı óńdeý zaýyty eki oblystyń bireýinde salynady
QR Energetıka vıtse-mınıstri Maǵzum Myrzaǵalıevtiń aıtýynsha, sheteldik kompanııa Teńiz ken ornynan taýyp jatqan tabystyń bir bóligin Qazaqstan ekonomıkasyna qaıta salýy tıis. Jyldyń basynda tıisti kelisimge de qol qoıylǵan bolatyn.
«Qazirgi kezde ol kompanııada biraz aqsha jınaldy. Ony el ekonomıkasyna salý qajet. Biz osy máseleni áli talqylaıtyn bolamyz. «Shevron» kompanııasy tórtinshi munaı óńdeý zaýytynyń qurylysyna atsalysýy múmkin. Negizi, atalǵan joba boıynsha naqty aqparat tek jyldyń sońynda ǵana bolady. Sebebi biz ony áli zerdelep jatyrmyz. Texnıkalyq-ekonomıkalyq esepteýlerdi jasap, aldyn ala negizdemeni ázirleýimiz kerek. Sol kezde naqty birneshe máseleni anyqtaý qajet. Birinshiden, zaýyttyń qaýattylyǵy qandaı bolady? Búginde esep-qısap bar. Biraq ony texnıkalyq-ekonomıkalyq negizdemege engizý kerek. Ekinshiden, jańa zaýyt qaı jerde ornalasady? Shıkizaty kóp batys oblysynda ma? Joq, álde tutynýshy kóp ońtústik jaqta ma? Úshinshiden, tórtinshi munaı óńdeý zaýyty ishki naryqqa, joq, álde eksportqa jumys isteı me? Osynyń bárin anyqtaýymyz qajet», - dedi M.Myrzaǵalıev Úkimet úıinde ótken baspasóz máslıxatynda.
Onyń aıtýynsha, aǵymdaǵy jyldyń aıaǵyna qaraı QazMunaıGaz merdigerlerdi anyqtaý sharalaryn bitiredi. Sol kezde jobanyń jalpy quny, qýattylyǵy jáne taǵy basqa erekshelikteri belgili bolady.
Aıta keteıik, búgin Maǵzum Myrzaǵalıev Qashaǵan ken ornynda munaı óndirý kólemin azaıtýdyń sebebin de túsindirdi.
foto:ok.ru
