Tórt jyl buryn joǵalǵan ózbekstandyq Atyraý oblysynan tabyldy
Atyraý oblystyq polıtsııa departamenti baspasóz qyzmetiniń málimetine súıensek, «Mıgrant» is-sharasy kezinde elimizdiń kóshi-qon zańdylyǵyn buzǵan sheteldikter anyqtalǵan.
«Mundaı is-sharany ótkizýdiń birneshe maqsaty bar. Birinshiden, kóshi-qon zandylyǵyn buzǵan shetel azamattary anyqtalady. Ekinshiden, olardyń el aýmaǵynda zańsyz júrýin boldyrmaý, al, úshinshiden, Qazaqstanyń aýmaǵynan óz erkimen shyǵý týraly sot qaýlylaryn oryndamaǵan sheteldikterdi anyqtaý kózdeledi. «Mıgrant» jedel-profılaktıkalyq is-sharasy kezinde Atyraý qalalyq polıtsııa basqarmasy kóshi-qon qyzmeti bóliminiń qyzmetkerleri 2019 jyldan beri izdeýde júrgen Ózbekstan Respýblıkasynyń 1975 jylǵy azamatyn anyqtady. Sheteldik 2017 jyly jumys babymen Qazaqstan aýmaǵyna kelgen. Al, 2019 jyldan beri Núkis qalasyndaǵy týystarynan baılanysyn úzgen. Sol sebepten, onyń týystary Núkis qalasynyń ishki ister bólimine aryz bergen. Osylaısha sheteldik azamat óz elinde iz-túzsiz joǵalǵandar tizimine engizilgen», -dep habarlady departamenttiń baspasóz qyzmeti.
Qazir polıtsııa qyzmetkerleri 48 jastaǵy sheteldiktiń kim ekenin anyqtap, eline qaıtarý úshin tıisti qujattar tizbesin jınaqtap jatyr. Ózbekstan Respýblıkasynyń azamaty qabyldaý-taratý ornyna ornalastyryldy.
Eske sala ketelik, budan buryn Ózbekstandyq qarııa Atyraýda 21 jyl boıy qujatsyz júrgenin jazǵan edik.
Keıin Atyraý oblysynda 13 jyldan beri qujatsyz júrgen ózbekstandyq anyqtalǵan bolatyn.