Tórt jyldan soń álemde 5G-di qoldaný kórsetkishi 80 paıyzǵa jetedi

 ASTANA. KAZINFORM – 2030 jyly 5G abonentteriniń sany 6,3 mlrd-qa jetedi, dep habarlaıdy Anadolu Ajansı.

2030 jylǵa qaraı 5G mobıldi trafıktiń 80 paıyzyna jetedi. Bul týraly «Vodafone Business Tech Connect Ankara» is-sharasynda sóz sóılegen Vodafone Türkiye bas dırektorynyń orynbasary Ozlem Kestıoglý aıtty.

Onyń sózinshe, atalǵan merzimge qaraı álemde ınternetke qosylǵan IoT qurylǵylarynyń sany 40 mıllıardtan asady.

— 2030 jylǵa qaraı 5G abonentteriniń sany 6,3 mıllıardqa jetip, mobıldi baılanys paıdalanýshylarynyń jalpy sanynyń 67 paıyzyna teń bolady, — dep keltiredi onyń sózin basylym.

Anadolu Ajansı da Kestıoglý 5G tehnologııasynyń eleýli ekonomıkalyq tıimdiligine arnaıy toqtalǵanyn atap ótedi.

Onyń baǵalaýynsha, 2030 jylǵa qaraı 5G-diń ekonomıkalyq áseri AQSh-ta 1,5 trln dollardy, al Qytaıda 1,2 trln dollardy quraıdy.

Ol 5G-di jaı ǵana baılanysty jaqsartatyn qural emes, joǵary jyldamdyq pen keń ótkizý múmkindigi arqyly tutas salalardyń damýyn jedeldetetin, ekonomıkalyq ósimge serpin beretin katalızator retinde sıpattady.

Osyǵan deıin 5G-diń jumys protsesimen qatar qyzmetkerlerdiń eńbek jaǵdaıyn da ózgertetini týraly jazdyq.