Sheteldik ınvestordyń banktik shottary zańsyz buǵattalǵany anyqtaldy
ASTANA. KAZINFORM — Investorlardyń quqyqtaryn qorǵaý komıtetine elimizde birqatar ınvestıtsııalyq jobany, sonyń ishinde Almaty oblysynda quny 120 mlrd teńgeden asatyn, 400-den astam jumys ornyn qurýdy kózdeıtin iri mal sharýashylyǵy keshenin júzege asyryp jatqan sheteldik Axis Holding Ltd kompanııasynyń basshysy júgindi.
Investordyń komıtetke kompanııanyń banktegi shottarynyń «Antıfrod-ortalyq» aqparattyq júıesine ınvestor týraly málimetter engizilgennen keıin buǵattalǵanyn aıtyp júgindi.
Komıtettiń tapsyrmasy boıynsha Qostanaı oblysynyń prokýratýrasymen birlesip shekteý sharalaryn qoldanýdyń zańdylyǵyna tekserý júrgizildi. Materıaldardy zerdeleý barysynda ınvestordyń eshqandaı tergelip jatqan alaıaqtyq qylmysqa qatysy joq ekeni anyqtaldy.
Sonymen qatar, shottardyń buǵattalýy ınvestıtsııalyq jobalardy iske asyrýǵa jáne kompanııanyń sharýashylyq qyzmetin júrgizýine eleýli kedergi keltirgeni belgili boldy.
— Qabyldanǵan sharalardyń nátıjesinde qylmystyq qýdalaý organdary jol bergen zań buzýdy joıdy. «Antıfrod-ortalyq» júıesindegi ınvestordyń mártebesi qaıta qaralyp, banktik shottaryna qoıylǵan shekteýler tolyq alyndy. Komıtettiń jedel aralasýy ınvestordyń quqyqtaryn sot talqylaýynsyz qalpyna keltirýge, ınvestıtsııalyq jobalardy odan ári iske asyrý táýekelderin boldyrmaýǵa jáne kompanııa qyzmetiniń turaqtylyǵyn saqtaýǵa múmkindik berdi, — dedi komıtettiń prokýrory Dınara Nursultanova.
Axis Holding Ltd kompanııasynyń basshysy Vasılıı Fılımonov Investorlardyń quqyqtaryn qorǵaý komıteti men prokýratýra organdaryna jaǵdaıdy jedel ári obektıvti qarastyrǵany úshin alǵysyn bildirdi.
— Sheteldik ınvestor úshin qıyn jaǵdaıda jalǵyz qalmaıtynyn bilý asa mańyzdy. Bizdiń jaǵdaıymyz Qazaqstanda ınvestorlardy qorǵaýdyń qoldanystaǵy tetikteri shynymen jumys isteıtinin kórsetti. Sondyqtan basqa sheteldik ınvestorlarǵa aıtarym: Qazaqstanǵa ınvestıtsııa salýdan jáne jobalardy iske asyrýdan qoryqpaý kerek. Kúrdeli máseleler týyndaǵan jaǵdaıda memlekettik ınstıtýttar bıznestiń máselesin tyńdap, jaǵdaıdy obektıvti túrde zerdelep, buzylǵan quqyqtardy qalpyna keltire alady. Biz óz tarapymyzdan jobalarymyzdy iske asyrýdy jalǵastyramyz jáne olardyń uzaq merzimdi damýyn Qazaqstanmen baılanystyramyz, — dedi Vasılıı Fılımonov.
Aıta ketelik Shymkentte ınvestordyń shottaryn 4 aı boıy buǵattaǵan salyq organyna aıyppul salynǵan edi.
