Tórt jańa taýar tobyna mindetti tańbalaý engiziledi
ASTANA. KAZINFORM — Qazaqstanda jasyryn ekonomıkamen kúresý úshin tórt jańa taýar tobyna mindetti tańbalaý engizilmek. Bul týraly Saýda jáne ıntegratsııa mınıstrliginiń baspasóz qyzmeti habarlady.
Qazaqstanda mindetti tańbalaýǵa jatatyn taýarlar tizbesi keńeıtildi. Tıisti buıryq Saýda jáne ıntegratsııa mınıstrligi tarapynan jarııalandy. Jańartylǵan tizimge tórt jańa taýar toby, ıaǵnı syra ónimderi, motor maılary, jeńil ónerkásip taýarlary jáne saıǵaq derıvattary (múıizi) engizildi.
Tsıfrlyq tańbalaý degenimiz árbir ónim birligine Data Matrix biregeı kodyn engizý protsesi. Bul kod taýarlardy tańbalaý jáne qadaǵalaý aqparattyq júıesinde tirkelip, ónimniń óndirilgen nemese ımporttalǵan sátinen bastap tutynýshyǵa jetkenge deıingi qozǵalysyn tolyq baqylaýǵa múmkindik beredi. Atalǵan júıe naryqtyń ashyqtyǵyn qamtamasyz etip, bıznestiń teń básekeli ortada jumys isteýine, tutynýshylardy kontrafakt pen sapasyz ónimnen qorǵaýǵa jaǵdaı jasaıdy.
— Taýarlar tizbesiniń keńeıýi olardyń aınalymyn baqylaý deńgeıin arttyryp, kóleńkeli saýda men kontrafaktilik ónim kólemin azaıtady. Jańa talaptardy engizý zańdy bıznestiń turaqty damýyna, ekonomıkanyń nyǵaıýyna jáne tutynýshylardyń quqyǵynyń qorǵalýyna yqpal etedi, — dep atap ótti Saýda jáne ıntegratsııa vıtse-mınıstri Áset Núsipov.
2025 jyldyń 1 jeltoqsannan bastap saıǵaq derıvattaryn (múıizderin) mindetti tańbalaý kúshine enedi. Zamanaýı sáıkestendirý quraldaryn qoldana otyryp engiziletin bul júıe derıvattardyń shyǵý tegin naqty anyqtaýǵa, olardyń zańsyz aınalymyna jol bermeýge jáne zańdy qorlaryn tıimdi baqylaýǵa múmkindik beredi. Osy arqyly memleket brakonerliktiń deńgeıin tómendetýdi kózdeıdi.
Syra ónimderi men motor maılaryn mindetti tańbalaý 2026 jyldyń 1 aqpannan bastap kezeń-kezeńimen júzege asyrylady. Jeńil ónerkásip taýarlaryn tańbalaý da birneshe kezeń boıynsha engiziledi, onyń alǵashqy kezeńi 2026 jylǵy 1 jeltoqsanda bastalady.
Aıta keteıik, saýda salasyndaǵy basym baǵyttardyń biri — naryqtyń ashyqtyǵyn qamtamasyz etý, barlyq qatysýshylar úshin teń jaǵdaı qalyptastyrý, sondaı-aq tutynýshylardyń sapaly ári qaýipsiz ónim alýyna kepildik berý. Tsıfrlyq tańbalaý júıesi osy mindetterdi iske asyrýdyń tıimdi tetigi.
Qazirgi tańda úsh taýar tobyna mindetti tańbalaý qoldanylady. Olar temeki ónimderi, aıaq kıim jáne dárilik zattar. Osy ýaqytqa deıin 7 mıllıardtan astam taýar birligi tańbalandy. Sonymen qatar zergerlik buıymdardy tańbalaý boıynsha pılottyq joba aıaqtaldy, al bıologııalyq belsendi qospalar, turmystyq hımııa, gaz ballondary, medıtsınalyq buıymdar, ósimdik maıy jáne aǵash materıaldaryn tańbalaý boıynsha pılottyq jobalar iske asyrylyp jatyr.
Eske salsaq bıyl qandaı taýar túrlerine mindetti tsıfrlyq tańbalaý engiziletini týraly jazǵan edik.