Tórt urpaq boıy Otanǵa adal qyzmet etip kele jatqan otbasy
ASTANA. KAZINFORM – Bir atanyń 4 urpaǵy 80 jyldan beri Otanǵa adal qyzmet etip keledi. «Búgin LIVE» baǵdarlamasyna qonaq bolǵan Kenjebek Tókeshov óziniń áskerı otbasy týraly aǵynan jaryldy.
Ol Otanǵa adal qyzmet etý – otbasyndaǵy eń basty qaǵıda ekenin aıtady.
– Biz, qazaq halqy, burynnan jaýynger halyqpyz. Otan – bizdiń anamyz bolsa, ony qorǵaý – perzenttik paryzymyz. Sondyqtan bul qyzmet bizdiń áýletimizde atadan balaǵa jalǵasyp kele jatqan dástúr. Otbasymyzdaǵy eń birinshi ustanym – Otanǵa degen mahabbat pen súıispenshilik, – deıdi QR UQÝ Bas shtab fakýltetiniń magıstranty.
Kenjebek Tókeshov 4 urpaqqa jalǵasqan áskerı qyzmettiń tarıhyna da toqtaldy.
– Meniń atam – Tókesh Óteǵalıev. 1941 jyly Uly Otan soǵysyna áskerge shaqyrylyp, 1943 jyly Stalıngrad túbindegi qandy shaıqasta habar-osharsyz ketken. Ol kisini izdestirý jumystary áli de jalǵasyp jatyr. Ol – meniń ákemniń amanaty. Odan keıin meniń ákem Jálıl Tókeshov – ol kisi 1955 jyldan bastap Keńes úkimetiniń Qyzyl armııasynda qyzmet etken. Odan keıin ózim. Men 1997 jyldan beri áskerı ant qabyldadym. Bıyl, buıyrsa, 28 jyl bolady. «Otanǵa adal qyzmet – elge etken eńbek» degen uranmen kele jatyrmyz. Tórtinshi urpaǵymyz – ol meniń ulym Asqar. Ol – 4-kýrs kýrsanty, – deıdi ol.
Stýdııa qonaǵy ulynyń áskerı qyzmetti qalaı tańdaǵanyn baıandady.
– Ulym Asqar 3 jasynan bastap meniń qasymda erip júrdi. Áskerge degen oıy, áskerı kıimge degen mahabbaty sol kezde ashyldy dep aıtsam, qatelespeımin. Kishkentaı kezinen bastap meniń áskerı kıimderimdi kıip, sýretke túsetin. Áskerı paradtarǵa, jaýyngerlik qyzmetterge, atys jattyǵýlaryna keıde meniń kezekshiligim túsip qalsa, menimen erip baratyn. Kishkentaıynan sarbazdardyń ómirine etene aralasty. Áskerı boryshymyzdy ótep júrgen kezde qansha qalalarda qyzmet ettik. Sol kezderde qasymda erip júrdi. Ulymnyń balalyq shaǵy kazarmada ótti desem de bolady, – deıdi áskerı áke.
Ulttyq ulan shebinde qyzmet etetin maman qyzynyń da áskerı salaǵa jaqyn ekenin jetkizdi.
– Asqardan keıingi qaryndasy da mektep qabyrǵasynda áskerı salaǵa baǵyttalǵan synypta oqıdy. Ol jerde bólimshe komandıri. Naqty áskerı salany qabyldaı ma, joq pa, ol áli belgisiz. Biraq tańdaýy áskerı qyzmet bolsa, qarsylyq bildirmeımiz. Árıne, bul – qyz balaǵa qıyn jol, – deıdi polkovnık.
Otanǵa adal qyzmet etip júrgen otbasynyń tórtinshi urpaǵy da tikeleı efırde onlaın baılanysqa shyǵyp, suhbat berdi.
– Bala kezimnen ákemniń tik turyp, Otan aldyndaǵy paryzyn adal atqarǵanyn kórip kele jatyrmyn. Ol maǵan úlgi boldy. Bul – meniń sanaly túrde qabyldaǵan sheshimim. Otan qorǵaý – meniń bala kezden kele jatqan armanym edi. Akademııany sátti aıaqtap, bolashaqta naǵyz kásibı ofıtser bolyp, elimniń tynyshtyǵyn qamtamasyz etetin bólimderde qyzmet etkim keledi, – deıdi Asqar Jálelov.
Ulttyq ulan akademııasynyń kýrsanty áskerı ómiri týraly aıtyp berdi.
– Akademııalyq oqý – úlken jaýapkershilikti talap etedi. Kún tártibimiz naqty bekitilgen. Erte turyp, kúnimizdi dene shynyqtyrýmen bastaımyz. Odan keıin teorııalyq jáne praktıkalyq sabaqtar ótemiz. Aptalyq daıyndyqtar, jattyǵýlar, saptyq daıyndyq – bári de bolashaq ofıtser úshin mańyzdy. Qazirgi ýaqytta ǵylymı jumys jazyp jatyrmyn. Jumysym – jasandy ıntellektti baılanys qurylǵylaryna engizý, – deıdi ol.
Aıta keteık, buǵan deıin 20 myńǵa jýyq áskerı qyzmetshiniń nesıeleri keıinge qaldyrylatynyn jazǵan edik.